Lo govèrn de Charest deu afrontar l’enquèsta sus un escandal de corrupcion e las protèstas dels estudiants. Los sobeiranistas del Partit Quebequés (PQ) son a la tèsta dels sondatges, seguits fòrça de près pels liberals. Los autonomistas poirián venir los arbitres de la nòva Assemblada Nacionala.

Lo primièr ministre de Quebèc, Jean Charest, enreguèt dimècres passat lo mecanisme legal per la convocacion d’eleccions anticipadas dins la nacion francofòna de l’America del Nòrd. Normalament caliá far las eleccions l’an que ven.
 
Lo govèrn quebequés, format del Partit Liberal (PLQ), se tròba en una situacion fòrça flaca a causa de l’enquèsta d’un escandal de corrupcion dins l’indústria de la construccion e en rason del lo dur braç de fèrre qu’an fach pendent tota l’annada los estudiants protestant contra l’aument de las taxas universitàrias.
 
Amb una popularitat plan amendrida, Charest a anonciat que los quebequeses auràn d’elegir los 125 deputats de l’Assemblada Nacionala lo 4 de setembre.
 
A un mes de las eleccions, lo PQ es en tèsta dels sondatges d’intencion de vòte. Lo sondatge que TVA Nouvelles publiquèt dimars balha 33% dels vòtes al PQ de Pauline Marois del temps que ne balha 31% als liberals. Per eles, seriá una pèrda d’11% en comparason amb las eleccions de 2008, quand lo PLQ capitèt 42% dels vòtes e la majoritat absoluda en sètis.
 
En dejós i auriá los autonomistas de la conservatritz Coalicion Avenir Quebèc (CAQ) qu’aurián 21% dels vòtes. En cas que lo resultat en sètis foguèsse fòrça just entre PQ e PLQ, los deputats de la CAQ poirián èsser imprescindibles per far una majoritat de govèrn. La CAQ es dirigida per François Legault, èx-membre del PQ e ancian ministre de l’Educacion e de la Santat per aquel partit. A la diferéncia del PQ, que prometèt en febrièr passat d’organizar un referendum “quand i aurà una majoritat sobeiranista”, la CAQ vòl suspendre lo debat sus l’organizacion politica de Quebèc e es per emplegar las possibilitats legalas qu’a l’autogovèrn del país a l’ora d’ara.
 
Qualtres autres tres partits disputan la lor intrada dins l’Assemblada Nacionala. Lo mai ben plaçat es l’independentista e anticapitalista Quebèc Solidari (QS), qu’a una intencion de vòte de 7% (en 2008 faguèt 3,8%) e que poiriá ratificar lo sèti del sieu cap, Amir Khadir, per la circonscripcion de Mercier. Pel Partit Verd serà fòrça mai malaisit, e mai se creis amb d’expectativas a l’entorn de 4%. Serà mai complicat per la sobeiranista Opcion Nacionala (ONT), fondada per l’èx-sòci del PQ Jean-Marie Aussant e qu’a una intencion de vòte de 2%.
 
Pr’amor que lo sistèma electoral quebequés es uninominal (i a 125 circonscripcions electoralas e dins caduna d’elas s’elegís solament lo candidat mai votat), es complicat de far de previsions sul nombre de deputats qu’aurà cada partit; lo sistèma tend a penalizar fòrça las opcions politicas que recebon pauc de percentatges de vòtes, levat se se concentran fòrtament dins una circonscripcion concreta, çò qu’es lo cas del QS a Mercier.
 

 
 




Aqueste article ven del jornal catalan Nationalia.cat, amb qui Jornalet a un acòrdi de cooperacion.