Actualitats
Brasil a aculhit la primièra edicion dels Jòcs Mondials dels Pòbles Indigènas
Aperaquí 2000 esportius de 40 comunautats autoctònas an participat en una competicion de disciplinas tradicionalas e modèrnas. De critias als organizadors e al govèrn brasilian per emplegar los Jòcs coma cortina de fumada.
Aperaquí 2000 esportius d'un quarantenat de nacions sens estat an participat, fins al 1r de novembre passat, a la primièra edicion dels Jòcs Mondials dels Pòbles Indigènas (JMPI), que se son celebrats a la vila de Palmas, capital de l'estat amazonian de Tocantins, en Brasil.
Los representants, venguts d'un vintenat d'estats dels cinc continents, an participat a d’espòrts tradicionals, coma lo tir d'arcs e sagetas, lo tir de lanças, l’estira-còrdas, las corsas de velocitat rustica o la navegacion en canòa rustica. Totun, an pas mancatde disciplinas mai universalas, coma lo fotbòl.
L'ÒNU, a travèrs del Programa de las Nacions Unidas pel Desvolopament (PNUD), sosten l'iniciativa. Se son faches parallèlament d'actes de caractèr cultural que meton de relèu l'identitat e las tradicions pròprias dels pòbles indigènas.
De criticas al govèrn brasilian
E mai se los objectius declarats pels organizadors son lo fach d'èsser una veirina per far conéisser melhor al Mond las culturas dels pòbles indigènas e que los atletes i anen pas tant per far a competicion mas per establir de ligams entre eles, qualques nacions indigènas de Brasil los an preferit boicotar. An argumentat que l'eveniment folkloriza los pòbles e denóncian que lo govèrn brasilian se servís dels JMPI per amagar lo conflicte permanent qu'ocasionan los proprietaris envèrs las comunautats autoctònas, que patisson d'atacs de la part de grops paramilitars.
D’un autre costat, lo Conselh Indigenista Missionari (CIMI), una organizacion restacada a la glèisa catolica, a criticat que l’argent investits pels Jòcs (100 milions de reales, aperaquí 23,3 milions d'èuros) son excessius, mai que mai s’avèm present los grèus problèmas de subsisténcia e d'extrèma vulnerabilitat que patisson los pòbles indigènas al Brasil.
Aquesta nòva es adaptada de Nationalia, amb qui Jornalet a un acòrdi de cooperacion.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Ningú mès que ells saben que és estimar i venerar la mare Terra.
Cal que els hi fem cas sinó anem a la desgràcia mès absoluta.
Escolteu-los.
"El Tàrrega".
Lo sistèmi capitalista ailà, e d'autres sistèmis pseudo-comunistas endacòm mai : totes los sistèmis autoritaristas e dominators vòlon la mòrts dels mai febles. Èsser una nacion sens estat non es un jòc ni una partida d'espòrt…
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari