Lo president de l’Eqüator, Rafael Correa, a assegurat dissabte passat qu’expausarà pas lo fondador de Wikileaks, Julian Assange, a la pena de mòrt e a insistit qu’adoptarà una decision sobeirana sus la siá demanda d’asil. Assange se refugièt dins l’ambaissada de l’Eqüator a Londres, lo 19 de junh passat, quand la justícia britanica respondèt positivament a la demanda d’extradicion de Suècia, per las acusacions de viòl presumit.

Dins la siá comparucion televisiva setmanièra, Correa a explicat dissabte lo rescontre que tenguèt divendres amb la maire d’Assange e a ratificat que prendrà una decision segon la constitucion del sieu país. Segon qualques mèdias, lo govèrn poiriá confirmar la siá posicion quand s’acabaràn los Jòcs Olimpics de Londres.
 
“Escotarem e farem de consultas, mas la decision serà sobeirana”, çò diguèt Correa, qu’apondèt qu’es conscient del perilh qu’Assange siá extradit de Suècia als Estats Units per la filtracion de milièrs de documents oficials de caractèr confidencial. S’aquò arribava, Assange riscariá d’èsser condemnat a mòrt.