Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaProvençaPaís Marselhés

Seguida d’agressions racistas a Marselha

Una joventa musulmana e un professor josieu son estats agressats amb arma blanca per carrièras

| Michiel1972
Los atemptats de París an fach pojar la tension sociala que se viu en Occitània. Ièr a Marselha se debanèt una seguida d’agressions racistas dont cal soslinhar l’ataca d’una joventa musulmana e d’un professor josieu, coma o rapòrta Libération.
 
La gojata se faguèt batre a la sortida del mètro Castelana, al centre vila. Un jove d’aperaquí 20 ans sautèt sus ela, l’escotelèt al torax amb un cutèr e li donèt un còp de ponh a la cara. L’agressor reprochava lo mocador que cobrissiá los cabels de la gojata e liava tota aquò amb los atemptats de París. La joventa foguèt menada a l’espital e l’agressor es activament recercat per la seguretat departamentala.
 
Un pauc mai tard, a l’entorn de 20 oras, un professor d’istòria d’una escòla josieva del 13n arredondiment se faguèt ferir al braç e a una camba per dos òmes, per carrièras. Los agressors arribèron sus un escotèr e s’arrestèron a la nautor de l’ensenhaire, que portava una quipà. Los nèrvis l’insultèron, li mostrèron una camiseta de l’Estat Islamic e arborèron sul telefòn mobil una fòto de Mohamed Merah. Puèi fugiguèron e ara son tanplan recercats per la seguretat departamentala.
 
Aquelas doas agressions fan seguida a un començament de setmana particularament tibat dins la capitala de Provença, ont las intimidacions se son multiplicadas dempuèi los atemptats de París. Diluns, un jove de 23 ans cridèt mai d’un còp “Allahu akbar” (“Dieu es grand”) a de policièrs e foguèt jutjat en compareissença immediata e condemnat a un an de preson ferma.
 
Apareisson de mai en mai per tot lo país de tags islamofòbs.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

NEUMULLER Aix-en-Provence
17.

Aperaqui cent mila musulmans vivon a Marselha, e quarante mila Jusieus. Totei tenon pas lo mume rapòrt a la religien, o a la comunautat. Aquelei que pòrtan veu va fa pas per lei mumas rasons, e la kippa pòu èstre un acte religós o politic...chasque individu resta amé sei rasons pròpris. Mai l'agach de mai que d'un autre, li fa vèire un islamista provocator o un jusieu extremista...Un pòrt-ciutat coma Marselha siguèt totjorn marcat per la mescladissa de populaciens. Lo problèma es de leis ajudar a viure ensems (lo pròpri deis umans) e non a costar leis uns deis autres (lo pròpri dei calhassas).
per d'informaciens que siáu anat cercar, legir aquí http://www.aquodaqui.info/En-temps-de-terrorisme-lei-terras-mai-tranquilas-e-lei-ciutats-plenas-d-ansia_a1018.html

  • 3
  • 0
Domergue Sumien Ais de Provença
16.

#14 Cau arrestar de dire d'inèpcias islamofòbas. Lei condemnacions musulmanas deis atemptats son estadas nombrosas e immediatas just après leis atemptats. Lo liame qu'indiqui au nº13 es una operacion musulmana de solidaritat amb lei victimas (una entretant), destinada a marcar la primiera setmana après leis atemptats. E oblidem pas que lei musulmans son tanben victimas dau terrorisme: http://www.lefigaro.fr/actualite-france/2015/11/20/01016-20151120ARTFIG00232--pantin-on-pleure-asta-jeune-musulmane-tuee-par-les-terroristes.php

  • 6
  • 2
Crostet
15.

#12 Sètz bon per aderir a Riposte Laïque, bon vent.

  • 9
  • 3
Independéncia de pensada
14.

#13
Val mai tard que pas jamai
mas Arriba amb una setmana de tard ...
L'endoman seria estat plan melhor

  • 5
  • 10

Escriu un comentari sus aqueste article