Bandièra01 1180x150: País Invisible

Actualitats

Grècia planh mai de 1500 violacions de son espaci aerian per d’avions militars turcs

Aquel malèsser de Grècia se manifestèt dins la reünion que faguèt l’OTAN a la demanda de Turquia per parlar de son accion contra l’avion rus

| Rob Schleiffert
“Que se passariá se Grècia començava d’abatre d’avions turcs per la meteissa raison que s’abatèt lo bombardièr rus Su-24?” Aquela question retorica l’an pausada plusors mèdias grècs. “Turquia es pas partisana de donar de detalhs quand se tracta de violacions de l’espaci aerian grèc”, çò apond Protothema, en tot remembrar que lo ministre de la defensa grèc, Panos Kammenos, prepausèt de crear una basa de l’OTAN sus las illas de la Mar Egèa per que l’Aliança Atlantica aguèsse una idèa clara del comportament de Turquia dins la region.
 
Turquia reconeis pas la zòna aeriana de dètz milas a l’entorn de las illas grègas, çò qu’a causat mantes incidents ont d’avions grècs percaçavan d’avions turcs intruses. Segon l’estat major de la Fòrça Aeriana grèga, pendent l’an 2014, s’enregistrèt 1269 violacions de l’espaci aerian grèc, compreses 14 subrevòls del territòri grèc, çò rapòrta Geopolítica.cat, que mençona tanben las violacions enregistradas ongan: 1233 dont 31 an ben penetrat dins lo territòri grèc.
 
Aquel malèsser de Grècia se manifestèt dins la reünion que faguèt l’OTAN a la demanda de Turquia per parlar de son accion contra l’avion rus. La reünion s’acabèt amb una brèva declaracion generica e formala del secretari general de l’organizacion, mas sens cap de document unitari. Semblariá qu’una granda partida dels sòcis de l’Aliança Atlantica son pas d’acòrdi per seguir las campanhas de tension d’Erdoğan.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

savonarole
1.

e i a totjorn d'òmes politics calucs que penson que l'Euròpa dèu aculhir la Turquia en son sen !

  • 6
  • 0

Escriu un comentari sus aqueste article