Bandièra01 1180x150: Comuna de Tolosa

Actualitats

Eleccions regionalas: trionf istoric del Front Nacional

Lo partit xenofòb s’impausa en Provença, en Lengadòc-Rosselhon-Miègjorn-Pirenèus e en Centre-Val de Léger

| France24

Los atemptats jihadistas de París an marcat las eleccions regionalas de l’estat francés. Las reaccions del govèrn socialista amb de decisions ultradrechistas, e mai lo discors ultradrechista del centre-drecha, an donat de resultats istorics al Front Nacional.


Un an après l’aprobacion de la reforma territoriala de l’estat francés, amb la reduccion del nombre de regions, se debanèt ièr lo primièr torn de las eleccions regionalas amb de resultats istorics de l’ultranacionalista Front Nacional (FN), amb una creissença de la drecha dels Republicans (LR) (èx-UMP) aliada al Modèm, e amb una reculada fòrta del Partit Socialista (PS). Lo PS que poiriá pèrdre las principalas regions que govèrna e qu’a quitament anonciat que se retira de las regions de Provença e de Nòrd-Pas de Calais, ont los resultats del partit xenofòb despassan lo 40%. L’estat d’emergéncia a marcat una campanha electorala que mancava de manifestacions, mentre que los partits majoritaris an optat per un discors de mai en mai intolerant e agressiu après los atemptats de París.
 
 
Ultrafrancisme al país
 
La neboda de Marine Le Pen, Marion Maréchal-Le Pen, dins sos 26 ans, se presentava dins la region de Provença-Alps-Còsta d’Azur en obtenent mai del 42% dels vòtes.  Marion es una de las grandas esperanças del partit e seguís la trajectòria familiala marcada per sa tanta. Son oncle Jean-Marie Le Pen, fondador e figura istorica del Front Nacional, es estat recentament exclús de son pròpri movement ultrafrancista.
 
Abans de conéisser los resultats definitius, Marine Le Pen diguèt que “lo Front Nacional es lo sol front veritablament republican” e cridèt “totes los patriòtas franceses” a jónher l’FN al segond torn. La cap xenofòba qualifiquèt los resultats de “magnifics” e critiquèt la “campanha de calómnias e d’intimidacions” que, segon ela, son movement las a patidas.
 
Nicolas Sarkozy, que parlèt tanben abans que los resultats foguèsson definitius, escartèt tot pache republican contra lo Front Nacional al segond torn. “Ni fusion de listas, ni retirada en cap de region”, çò diguèt.
 
 
Los socialistas se retiran de Provença
 
De son costat, lo pòrtavotz del govèrn francés, Stéphane Le Foll, considerèt que la soma dels vòtes d’esquèrra en França èra majoritària, e mai se lo PS es la tresena fòrça de l’estat. “Lo total de l’esquèrra, que se ditz qu’es en dificultat, deu despassar lo 36%, çò que ne fa lo primièr partit de França”, çò diguèt Le Foll, en comptar tanben los vòtes dels ecologistas e del Front d’Esquèrra. Pasmens, lo primièr secretari del PS, Jean-Christophe Cambadélis, confirmèt que los socialistas se retiran  del segond torn dins las regions ont las listas d’esquèrra an pas de possibilitats de ganhar.
 
 
Drecha e ultradrecha en Occitània e Catalonha
 
Occitània es concernida per cinc regions grandassas: lo Centre-Val de Léger que tòca una petita partida del nòrd del país; Auvèrnhe-Ròse-Alps que tòca Auvèrnhe, Velai, lo Dalfinat, los Alps occitans e una partida de Provença; Aquitània-Lemosin-Peitau-Charantas que tòca una partida de Gasconha, Agenés, Peiregòrd e Lemosin; Lengadòc-Rosselhon-Miègjorn-Pirenèus que tòca la partida orientala de Gasconha, l’occident de Provença e Lengadòc; e Provença-Alps-Còsta d’Azur que tòca la rèsta de Provença e lo Comtat de Niça.
 
L’extrèma drecha del Front Nacional a conegut una granda pojada de vòtes en obtenent la victòria d’aquel primièr torn en Provença, Lengadòc e Centre-Val de Léguer amb de resultats creissents (près del 34% en Lengadòc, mai del 42% en Provença e mai del 30% en Centre-Val de Léger). En Auvèrnhe-Ròse-Alps, lo primièr torn es ganhat per LR amb aperaquí lo 30% dels vòtes. Tanben LR ganha lo primièr torn en amb aperaquí lo 32% dels vòtes.

Per contra, en Aquitània-Lemosin-Peitau-Charantas, lo primièr torn es ganhat pel PS amb amb aperaquí lo 30% dels vòtes.
 
 
“La via de la Resisténcia” en Lengadòc
 
Dins la nòva region de Miègjorn-Pirenèus-Lengadòc-Rosselhon, fruch de la fusion de doas regions que fins ara lo PS las governava, l’FN a superat de 9 ponches los socialistas. La lista Mond Novèl, dirigida per l’èx-eurodeputat Gérard Onesta, segondada per Europa Ecologia-Los Verds, lo Front d’Esquèrra e lo Partit Occitan, es arribada al 10% e pòt passar al segond torn. Aquela lista prepausa una seguida de mesuras per la lenga occitana e, segon Onesta, “lo Mond Novèl dobrís una nòva via, la de la resisténcia”.
 

 
 
Lo nacionalisme dels pòbles se mobiliza en Corsega e Bretanha
 
En Corsega l’autonomisme a obtengut son melhor resultat. La lista Femu a Corsica, conducha per Gilles Simeoni, es venguda lo partit mai votat de l’illa amb lo 17,62% dels vòtes. E quitament Corsica Libera a obtengut un considerable 7,72%

Al conselh regional de Bretanha, ont los socialistas se poirián impausar amb clartat, l’Union Democratica Bretona (UDB) a confluit amb lo cap del movement indignat dels Bonets Roges, Christian Troadec, e an obtengut lo 6,71% dels votes.
 
 
 

Podètz consultar los resultats definitius de las eleccions regionalas sul sit del Ministèri de l’Interior francés.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
3.

Açò es pels atemptat, enlhoc de far la política de pas seguiment de los EEUU e ser un país neutral, se tiran cap a la dreta extrema. Enloc de far una política cultural d'ensenhament de las lengas regionalas,ni tan sols las anomenan los grans partits.

  • 1
  • 0
Guilhèm Thomàs Tolosa
2.

Lo programa de Loïs Aliòt :

1) Cambiar lo menut a la cantina ("Manjar Francés" - vòl dire pas mai de pizzà ?)
2) Gelar de taxas d'existisson pas (Las famosas "taxas regionalas").

Se i a ben un partit que se trufa de sos electors es plan aquel.

  • 13
  • 1
lo joèl tolosa
1.

Sem sus un camin resquilhós, atencion de tombar pas dins lo fangas!!!!

  • 7
  • 1

Escriu un comentari sus aqueste article