Bandièra01 1180x150: Comuna de Tolosa

Actualitats

Primièra participacion d’elegits de partits tradicionals a las Jornadas Internacionalas de Corti

Los elegints particièron a un debat amb los independentistas sul futur institucional de l'illa
Los elegints particièron a un debat amb los independentistas sul futur institucional de l'illa | Corsica Libera

Un desenat d’elegits còrses dels partits tradicionals participèron dimenge passat, per lo primièr còp, a las Jornadas Internacionalas de Corti. Los elegits participèron a un debat amb los independentistas sul futur institucional de l’illa.


Los elegits foguèron convidats a las jornadas pel partit independentista Corsica Libera, qu’a 4 elegits (sus 51) dins l’Assemblada de Corsega, e qu’organiza cada an aquelas jornadas amb succès a Corti, qu’es dins la capitala istorica de Corsega.
 
Davant un milièr de personas amassadas, qualques membres de l’executiu de la Collectivitat Territoriala de Corsega (CTC), dont la majoritat son d’esquèrra, levat un deputat de l’UMP, Laurent Marcangeli, debatèron sustot de la cooficialitat de la lenga còrsa, de la question financièra fàcia a l’especulacion e de la reforma de las institucions.
 
“Çò qu’arriba uèi es essencial. Sèm pro madurs per portar a París la nòstra volontat de reforma”, çò diguèt Marcangeli a l’AFP en tot plaidejar per un “dialòg franc e sens tabó”. Lo deputat drechista apondèt que s’èra “trobat un consens dins l’Assemblada de Corsega”, amb los autres deputats de l’illa, per defendre a París las reformas constitucionalas que fan besonh.
 
Al nom del Partit Socialista, la conselhièra executiva Emmanuelle de Gentile manifestava la siá jòia per la victòria socialista a las eleccions territorialas de 2010. “Lo debat se pòrta tre ara al fons” çò diguèt Gentile que soslinhèt egalament que “la volontat de reforma deviá venir de Corsega”.
 
En representant lo corrent nacionalista moderat, l’elegit territorial Michel Castellani,  de Femu a Corsica (11 elegits), diguèt que la convergéncia amb los independentistas èra “una escasença de prene”.
 
Pel president de la comission sus l’evolucion institucionala a l’Assemblada, Pierre Chaubon, l’iniciativa de Corsica Libera “es la pròva d’una maduretat nòva” dins la classa politica de l’illa. Chaubon plaidejarà per un novèl vam de descentralizacion en Corsega tre qu’intrarà en octòbre al Senat francés. Pasmens “i aurà pas cap de sortida en defòra de la Republica e dins la violéncia dins totas las siás formas” çò apondèt Chaubon.
 
Las Jornadas Internacionalas son un eveniment que se debana un còp per an a la vila de Corti dempuèi 1987. La lor tòca es la revendicacion de la lenga còrsa e del nacionalisme còrs, e es vengut un eveniment transnacional que i participan non solament d’organizacions còrsas, mas tanben de movements independentistas d’en pertot: bretons, catalans, bascos, galeses, irlandeses, occitans, sardes, sicilians, tiroleses, alsacians e canacs.
 
Libertat! es lo movement que normalament representa Occitània dins aquelas jornadas.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Estèla Malhana
1.

Fins a 2008, Occitània èra representada a Còrti per lo president dau PNO d'aquèu temps Jaco Ressaire. Es ben de veire que ié van totjorn d'occitanistas per portar la votz d'Occitània.
Se que non, lis avançadas institucionalas còrsas son a seguir ambé atencion. Siam juste en faça d'èli...

  • 4
  • 0

Escriu un comentari sus aqueste article