Lo mes de març que ven, los ciutadans de la Nòva Zelanda decidiràn se vòlon contunhar amb la bandièra actuala o se n’adòptan una de nòva. Las rasons del cambiament son divèrsas mas las doas principalas son las seguentas. D’un caire, la bandièra actuala sembla tròp la d’Austràlia e fòrça gents las confondon. De l’autre caire, la bandièra actuala incorpora lo drapèl britanic —l’Union Jack— e donc representa pas lo pòble maòri.
 
Lo debat sus la bandièra es estat primièr una competicion eliminatòria entre cinc proposicions desparièras. S’anoncièt dimars passat que la bandièra ganhanta es la qu’apond la color negra e lo feuse argentat: son totes dos de simbòls esportius que lo rugbi los a faches populars per representar la Nòva Zelanda de pertot. La bandièra causida manten la constellacion de la Crotz del Sud e la color blava de la bandièra actuala mas fa desaparéisser la bandièra britanica. S’afrontarà en referendum a l’actuala bandièra oficiala de l’archipèla.