Bandièra01 1180x150: Comuna de Tolosa

Actualitats

Los presidents dels dos estats de Chipre se son desirat la patz en parlant dins la lenga de l’autre

Los dos govèrns negòcian dempuèi lo mes de mai la reünificacion de l’illa

Los caps de Chipre e de la Republica Turca de Chipre del Nòrd emetèron un messatge en vidèo ont cadun s’exprimís dins la lenga de l’autre per desirar la patz a totes los chipriòtas. Es una nòva manifestacion d’unitat dels dos caps que trabalhan dempuèi longtemps per la reünificacion de l’illa.
 
Lo messatge foguèt transmés per la television e es estat publicat sus YouTube. Lo President de la Republica de Chipre, Nikos Anastasiadis, e lo cap turcochipriòta, Mustafa Akıncı, exprimiguèron lor esperança d’una rapida reünificacion de l’illa devesida fa 41 ans.
 
“Espèri que l’an novèl nos permeta de viure coma abans, en patz, dins un país reünificat”, çò diguèt Anastasiadis, que parlava turc en public per lo primièr còp. A son costat, Akıncı diguèt en grèc: “Espèri que l’an novèl pòrte una patz duradissa, de serenitat e de prosperitat a totes los chipriòtas”.
 
L’illa es devesida dempuèi l’invasion en 1974 de la partida nòrd per Turquia, en responsa a la proposicion d’unir l’illa a Grècia. La Republica Turca del Nòrd de Chipre es solament reconeguda diplomaticament per Ankara.
 
Dempuèi lo mes de mai, los dos govèrns fan de discussions per un procès de reünificacion de l’illa.
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article