L’Organizacion Mondiala de la Santat (OMS) declarèt ièr Guinèa liura de l’Ebòla. Ièr fasiá 42 jorns que la darrièra persona infectada mostrèt un resultat negatiu a l’espròva del virus e l’OMS a pogut declarar lo país liure de la malautiá. Sierra Leone foguèt ja declarada salva del virus en novembre passat e Libèria en setembre. L’Africa occidentala es pròcha de celebrar la fin d’aquela cachavièlha, mas l’OMS sosten qu’ara cal téner una susvelhança maximala dins los meses venents.
 
Segon l’OMS se pòt pas parlar encara de la fin de l’epidèmia e per tant Guinèa intra dins un periòde de nonanta jorns de susvelhança per garentir que quin que siá novèl cas de contagion serà identificat rapidament abans que se propague dins la populacion. Se passèt ja en Libèria, qu’après èsser declarada liura de l’Ebòla, vegèt encara un petit nombre de cases que poguèron èsser rapidament contenguts.
 
“Los meses avenidors seràn absoludament crucials, pr’amor que serà lo periòde que los païses deuràn èsser segurs que son preparats per prevenir, detectar e respondre a quin que siá cas novèl”, çò soslinhèt lo responsable de l’OMS dins la lucha contra l’Ebòla, Bruce Aylward. A l’ora d’ara, l’ÒMS ten una armada de 1013 collaboradors desplegats en Guinèa, Libèria e Sierra Leone.
 
Un país es declarat liure de transmission de l’Ebòla quand passan dos periòdes de 21 jorns dempuèi lo segond resultat negatiu d’un pacient garit. Aquò es lo periòde maximal d’incubacion del virus, mas los expèrts soslinhan que lo risc persistís al delà, sustot a causa de la subsisténcia del virus dins cèrts fluids corporals, mai que mai dins lo semèn, ont pòt subreviure de còps fins a nòu meses.
 
 
Mai d’onze mila mòrts
 
Aquesta darrièra flambada es estada la pièger après l’identificacion del virus en l’Africa centrala en l’an 1976. Se son registradas 28 601 contagions dont 11 315 personas son mòrtas. Las victimas se concentran al 99% dins aqueles tres estats de l’Africa occidentala, çò es Guinèa, Libèria e Sierra Leone.
 
Aqueles païses afrontan ara l’enjòc de tornar metre en plaça e refortir lors sistèmas sanitaris, degalhats per la pression qu’an patit durant los moments mai terribles de l’epidemia, que causèt de nombroses infectats e mòrts demest lo personal medical.
 
De l’ajuda internacionala qu’an recebut, cal remarcar l’ajuda de Cuba, que mandèt 461 mètges, e tanben, mai que mai, lo prètzfach de Mètges Sens Frontièras.
 
 
D’epidemias mai inquietantas que l’Ebòla
 
E mai se l’Ebòla a levat la panica dins lo Mond entièr, se cal avisar qu’en Africa es pas la causa de mortalitat mai inquietanta. Coma o remembra ben lo jornalista Xavier Aldekoa, la malària, lo sida e sustot la famina tuan fòrça mai de personas dins lo continent empaurit.