Bandièra01 1180x150: País Invisible

Actualitats

Catalonha e Aran: acòrdi in extrèmis per formar un govèrn per l’independéncia

Lo president serà Carles Puigdemont, primièr cònsol de Girona, e i aurà de cambiaments dins lo grop dels deputats de la CUP

L’acòrdi per formar govèrn en Catalonha e Aran arribèt arser in extrèmis. Lo president en foncions de la Generalitat, Artur Mas, decidiguèt de se retirar per facilitar l’acòrdi entre las doas formacions independentistas, çò es Amassa per l’Òc (JXS) amb 62 deputats e la Candidatura d’Unitat Populara (CUP) amb 10, e aital se pòt avançar dins procès cap a l’independéncia. Lo president de la Generalitat serà lo primièr cònsol de Girona, Carles Puigdemont, qu’es tanben lo president de l’Associacion dels Municipis per l’Independéncia (AMI). Artur Mas a pres aquela decision personalament.
 
Uèi expira lo relambi per formar un nòu govèrn, e justament uèi a 16h s’amassa lo Parlament de Catalonha per far l’investidura del nòu president.
 
Dins una conferéncia de premsa, Artur Mas se diguèt convencut que sa decision de far “un pas de costat” entraïnava mai de beneficis pel procès d’independéncia que non pas prejudicis al nivèl personal. L’acòrdi arribèt après “de movements faches al darrièr moment per de personas, d’organismes e de dirigents politics”, çò confirmèt lo president en foncions.
 
Artur Mas se retira d’aquesta legislatura. Diguèt que fariá pas partida del nòu govèrn, e mai se dins las negociacions li prepausavan de cargas alternativas. “Serai president o èx-president”, çò aviá dich mai d’un còp. Ara se consagrarà a la refondacion de son partit, Convergéncia Democratica de Catalonha (CDC).
 
 
L’acòrdi
 
Al delà de la retirada d’Artur Mas, l’acòrdi compren una contrapartida generosa de la CUP, que cedirà dos deputats a las dinamicas parlamentàrias d’Amassa per l’Òc per fin que l’estabilitat parlamentària siá blindada. En mai d’aquò, la CUP reconeis d’errors dins lo procès de negociacion, çò que se tradutz dins lo renonciament de dos autres deputats que seràn remplaçats. “Aquel acòrdi fa que siá Amassa per l’Òc los que contraròtlen l’activitat parlamentària amb l’engatjament explicit de la CUP per que i aja d’estabilitat parlamentària”. E tanben la CUP s’engatja a votar pas dins la meteissa direccion que los grops opausats al procès independentista e opausats a Amassa per l’Òc.
 
Pasmens, la CUP assegurèt que son prètzfach contra l’austeritat e per las politicas socialas contunhariá coma de costuma.
 
 
Lo govèrn d’Espanha remembra “l’empèri de la lei”
 
Sul pic lo govèrn en foncions de l’estat espanhòl publiquèt un comunicat en remembrant al Parlament de Catalonha que “totes sèm someses a l’empèri de la lei” e que “la Constitucion Espanhòla es la que garentís l’autogovèrn de Catalonha”. E mai, lo govèrn afirma qu’“Espanha garentís que la lei se respectarà” e fa una crida a l’unitat politica dels partits espanhòls per “far fàcia al desfís independentista”.




Mas dimiteix per desblocar  l’acord i avançar...per vilawebtv




Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Chap
7.

#6 I beg your pardon ?

  • 1
  • 1
Terric Lausa Quilhan
6.

#4

Los "anglofòns" se creson subre los autres?
Aquela empega! D'ont sortissètz aquela idèa?

Bullshit my friend!

  • 2
  • 2
ilergeta Lhèida
5.



Moltes gràcies pel vostre suport.

Lluitem per assolir la nostra llibertat i per aconseguir una societat més justa .

Salutacions.

  • 4
  • 0
Ernèst Guevara Jr. L'Avana
4.

#3 Espanha garentís que la lei se respectarà ; e òc, mas Catalonha tanben farà respectar la lei democratica, la lei democratica de Catalonha, res mens.


I a tres menas de pòbles : 1) los que se creson subre los autres, 2) los que los i creson e 3) los que sabon plan que totes los pòbles son egals en qualitat e en dreits… Ailàs, se los Catalans son dels tresens, tròpes Occitans son pas que del segond. Los Franceses e los Castelhans, tant coma los anglofòns, son plan segur dels pirmièrs, e se se permeton encara de se trufar de l'engana qu'i descaiguèt lo pòble alamand durant lo mitan del sègle passat.

  • 5
  • 2
Tèrra e libertat
3.

Si ben, FF, "totes sèm someses a l’empèri de la lei". Mas ta lèi non es la nòstra, e aquò, te va caler un moment per l'entendre a de bon…

  • 1
  • 0

Escriu un comentari sus aqueste article