Bandièra01 capçalera  1180x150: Novestivada

Actualitats

crotz-tolosaCreated with Sketch.ProvençaProvençaPaís d'Ais

Espavent al casinò d’Ais de Provença

Un còp de mai de bandits bracan aquel casinò vesin d’un comissariat. De clients se feriguèron dins la panica. I a pas de rapòrt amb las autos cargadas d’armas de la Jonquera

| Google maps
Dins la nuèch de divendres a dissabte, a 2h00, de bandits armats amb de fusilhs Kalashnikov AK-47 braquèron lo casinò d’Ais de Provença, qu’aperten a l’entrepresa Pasino. Raubèron a la caissa qualques milièrs d’èuros e tirèron sus una paret de veire. De clients paniquèron en cresent se tractava d’un atemptat terrorista e, dins l’agitacion, un quinzenat foguèron ferits après tocar de tròces de veire al sòl.
 
Es pas lo primièr còp qu’aquel casinò es atacat ansin, e mai siá a un centenat mètres del comissariat central de la polícia d’Ais de Provença. Los policièrs arribèron lèu-lèu mas los malfactors ja avián fugit.
 
La direccion del casinò aviá installat d’esquipaments ultramodèrnes de seguretat: en particular, espèra que se pòsca retrobar los bandits gràcias a un liquid especial que se seriá aspergit automaticament sus eles pendent lo bracatge.
 
Dissabte d’aprèsmiègjorn, a la Jonquera (Catalonha), a la forntièra dels estats francés e espanhòl, la polícia arrestèt doas autos subrecargadas d’armas. Una de las doas autos reüssiguèt a fugir, l’autra non. Un conductor arrestat seriá originari de Niça.
 
Se pensèt un moment que las doas autos de la Jonquera èran liadas amb lo bracatge d’Ais de Provença. Totun, dimenge, lo quotidian La Provence revelèt que i aviá pas de rapòrt entre los dos afars en s’apiejant sus d’indicas de la polícia. Las armas interceptadas a la Jonquera son diferentas d’aquelas d’Ais.



Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

SEMPERVIRENS
1.

an pas mitralhats a bòudre lei centenas de jugaires presents, doncas fau la deduccion que s'agissiá d'islamistas moderats...

  • 3
  • 12

Escriu un comentari sus aqueste article