Bandièra01 capçalera  1180x150: Novestivada

Actualitats

Serada de sosten a l’encontre d’escolans d’occitan de Pian de Garona e de Clarmont d’Erau

Gric de Prat harà un concèrt lo 12 de març que ven a Sent Macari per finançar lo viatge daus escolans

| Gric de Prat

Desempuei lo mes de setembre de 2015, los escolans d’occitan dau collègi del Pian de Garona (Grava) son abessonats dab lurs omològs dau collègi de Clarmont d’Erau (Lodevés). L’idèa d’aquera paria ven de lur professor, Eric Roulet, actor daus màgers de l’occitan en Bordalés e musicaire. Rifolant d’idèas e de dinamisme, Eric se fit la reflexion qu’abessonar duas classas d’occitan dens duas contradas dau País d’Òc podèva estar lo mejan d’establir ligames entre aprenents, parents e escolans a mei de tornar aviar relacions intraoccitanas entre Gasconha garonenca e Lengadòc lodevés.
 
Sembla ben d’estar que lo richèir d’aquera relacion neishenta auge despassat las esperanças daus organizaires, que cutan ben contunhar a mei ahortir aquera experiéncia intraoccitana.
 
Dens lo quadre dau projècte, un encontre entre los dus grops d’escolans aprenents se diu har au primtemps. Mès lo viatge diu estar finançat per lo quite grop.
 
Es per fin de permetre, a la fin de tot, a tots aqueths escolans e escolanas neooccitanofòns de s’encontrar que Gric de Prat, lo grop d’Eric, de son esposa Natàlia e de sos mainatges, a decidit d’apitar un concèrt lo 12 de març a la Sala de las Hèstas de Sent Macari (Entre Duas Mars), dab un prètz d’entrada de 5 èuros. En premèira partida, poiràn veire los escolans montar en scèna per tant de representar l’adaptacion per Roulet e son grop d’una peçòta de l’escrivan occitan locau Elias Boirac (1810-1884). En segonda partida, Gric de Prat sonarà, cantarà e harà dançar un cadun.
 
Per qu’aquera experiéncia necessària a l’espandiment de la cultura occitana d’un extrem a l’aute d’Occitània se pusque far, pregam tots los e las que pòden passar capvath Sent Macari ende aqueth mes de març de se mobilizar per qu’i auge lo mei de mond possible.
 
 
 
 
Dàvid Escarpit



 


Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Redaccion
2.

#1 Mercés plan per la remarca. As rason. Perdon per l'error, es ja corregit

  • 1
  • 0
lo Pèir Sent Pantaleon de l'archa
1.

Se tracha del collègi de lo Pian de Garona ras de Lengon e non pas de lo Pian de Medòc pensi ?

  • 1
  • 0

Escriu un comentari sus aqueste article