Bandièra01 1180x150: Comuna de Tolosa

Actualitats

crotz-tolosaCreated with Sketch.Lengadòc

Un mes de març plan occitanizat dins Aude

Mai d’un rendètz-vos bèl occitan se tendrà dins Aude long del mes de març: Marcejadas a Carcassona, Fasètz la Lenga en CabardésÒc en Fèsta a Canet d’Aude, sens parlar d’un recital Nadau a Castèlnòu d’Arri o la fin de l’edicion 2016 del Carnaval de Limós e de plan d’autres moments e luòcs qu’anam espepissar.


Marcejadas de 2016
 
E lo mes de març començarà... lo diluns 29 de febrièr amb lo primièr dels cinc rescontres de las Marcejadas 2016, organizadas per l’Institut d’Estudis Occitans Aude e lo Cercle Occitan del País de Carcassona.
 
Tres rescontres se debanaràn a l’Ostal Sirventés (79, la Trivala, Carcassona), a 18h30 (dintrada liura).
 
— Lo diluns 29 de febrièr, Carles Camberoque parlarà de motociclisme a Carcassona, dins los ans 1930: “Le circuit doblidat. Naissença e doblit del circuit de Salvazan, la volontat dels politics, l’importància de la premsa”.
 
— Lo dimècres 2 de març, Cristina Cabantous, acompanhada musicalament per Pascal Cabantous, legirà de tròces de son obratge Fais un nœud à ton mouchoir, una descripcion de Menerbés e de la Montanha Negra al sègle passat.
 
— Lo divendres 4 de març, amb lo concors de Patrimònis, Vals de Cabardés, s’evocarà lo Doctor Pébernard, veterinari e tanben folclorista de Concas d’Orbièl.
 
E mai, lo dijòus 3 de març, a 18h, se poirà vistalhar la Braçariá Ciutat a la Borieta (sus inscripcion: 04.68.25.19.78). E lo dissabte 5 de març de matin, a la Librariá Mots & Cie, un moment lectura amb Valérie Schlée e Alan Roch a l’entorn dels tèxtes de Joan-Enric Fabre, entomologista e felibre.
 
E lo dissabte 5 de març de ser, la jove Calandreta la Rosèla vos convida a sa quina ont los numèros seràn, de segur, cridats en occitan.
 
Dimenge 6, darrièra jornada festiva de la rabassa d’ivèrn a Cabrespina amb la jornada “Trufa e patrimòni” http://www.aude-truffes.com/francais/trufficulteurs-aude-agenda.shtml
 
 
Òc en fèsta a Canet d’Aude
 
Òc en Fèsta se debana a Canet d’Aude sus quatre dissabtes amb un espectacle cada còp en serada dins la Sala de las Fèstas d’aquela comuna de l’airal narbonés.
 
— Lo dissabte 5 : teatre amb Catinon e Jacotin (Jacotin pren la retirada).
 
— Lo dissabte 12: Arnaud Cance presenta son espectacle Saique benlèu.
 
— Lo dissabte 19: Balèti menat per Fai Deli.
 
— Lo dissabte 26: descobèrta del grop gascon de Vasats: los Caps Negues.
 
 
Fasètz la lenga en Cabardés
 
La programacion bèla d’aquesta mesada occitana audenca se ten en Cabardés del 7 al 19 de març, amb la quinzenada Fasètz la Lenga en Cabardés. Lo programa s’adreiça a totes los publics e mescla cants, teatre, contes, descobèrta del país amb d’agaches tan plan istorics coma actuals.
 
L’estrena se farà lo diluns 7 de març a Puègnautièr amb una prestacion del grop vocal Cossí que Siague (18h30), abans una serada consagrada al poèta nimesenc Antòni Bigòt (21h). Dimècres 9, rendètz-vos a Mossolens amb Danièla Julien e sos contes, Lo diable pòrta pèira. Divendres 11, retorn a Puègnautièr per una pèça en occitan e catalan, Lo monument a las vidas, per denonciar l’esperit guerrièr. Plaça al cabaret occitan dissabte 12 a Villagalhenc animat pel trio Aqueles.
 
Jorcosinada conviviala e familiala lo dimenge 13 a Mossolens amb un talhièr-cosina (10h) e una passejada comentada (14h30). Lo dimarç 15, se passarà a taula a Argon (19h, 15 €; reservacion: 06.87.37.03.79), abans de dançar amb Fresquèl. Argon recebrà tanben l’espectacle interactiu menat per Isabèla François: A l’escota dels mots (dijòus 17, a 21h).
 
Lo final de tria del dissabte 19 se debanarà a Ventenac de Cabardés amb la venguda del reconegut e famat grop polifonic de MarselhaLo Còr de la Plana, menat pel Manu Théron.
 
E mai, de talhièrs de descobèrta de l’occitan se tendràn (18h30) a Mossolens (dimècres 9), Puègnautièr (divendres 11) e Argon (dijòus 17). Los escolans dels 5 vilatges aprendràn un cant amb Aimat Brees (dijòus 10 e divendres 11). Se poirà veire a Puègnautièr la mòstra del CIRDÒC, Lengas de guèrra.
 
 
E tanben...
 
En país d’Aude, aqueste mes de març veirà tanben:
 
— La Vadrouille des Golamàs faire estapa a Camplong d’Aude amb un balèti (Sulfataires Occitans e Pech-Luna) lo divendres 11 e concèrt amb Golamàs’K, los Innocents e Sax Peace Tools.
 
Nadau balharà un concèrt lo dissbate 12 de març a Castèlnòu d’Arri.
 
— Lo talhièr de danças de l’Ostal dels Joves de Carcassona organiza un rescontre aqueste meteis dissabte 12: talhièrs de vèspre, puèi balèti amb Fresquèl e Tshakabass, davalats de Bigòrra.
 
— Pels afogats d’ecologia, los Rescontres Naturalistas d’Aude se tenon aquela dimenjada dels 12 e 13 al Licèu Agricòla Carlesmanhe de Carcassona, que recebrà lo divendres 18 e dissabte 19 la Fièra dels Vins dels Licèus Agricòlas de França.
 
— De tot biais aquela dimenjada, vos caldrà ben pèrdre la canturla vist qu’es tanben la fin del Carnaval de Limós: sortidas dels joves e dels limosencs lo dissabte 12 e seràn los acadians qu’asseguraràn la darrièra jornada (dimenge 13), lo jutjament e lo lenhièr.
 
— Lo dimarç 22 de vèspre, los calandrons de Carcassona se produiràn de vèspre sus l’empont del Teatre municipal de la vila.
 
 
Puèi vendrà abril...
 
E lo mes d’abril, començarà lo dissabte 2 d’abril amb la Serada del Cercle Occitan de Narbona ont se poirà dançar amb lo trio Tripoux. Seguirà lo Festenal del Conte de Limós del 9 al 16 d’abril amb una serada (lo diluns 11) organizada per l’IEO-
Aude e doas representacions de Quesaquò e Mascomprés per La Rampa-TIO... Ne tornarem parlar.
 
 
 
 
Alan Roch
 



 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article