L’istoric partit republican irlandés Sinn Féin a obtengut sos melhors resultats de l’istòria recenta dins las eleccions al parlament del sud d’Irlanda. La formacion de Gearóid Mac Ádhaimh (Gerry Adams) es passada d’un sosten del 9,9% al 13,8% e es venguda la tresena formacion politica del parlament, darrièr lo democrata-crestian Fine Gael e lo centrista Fianna Fáil, qu’istoricament an alternat al poder dins l’estat liure d’Irlanda. Las eleccions se tenguèron divendres passat, mas lo sistèma d’escrutini a vòte unic transferible d’Irlanda complica lo recompte.
 
Las doas formacions majoritàrias son demoradas quasi egalas en percentatge e caldrà veire pus precisament quantes deputats obtendrà cada fòrça politica per saber las possibilitats de paches de la nòva legislatura. Lo Fine Gael, lo partit del primièr ministre, Enda Kenny, a ganhat un còp de mai, mas a davalat del 36% qu’aguèt fa cinc ans al 25,5% dels vòtes. De son costat, lo Partit Trabalhista, lo sòci de govèrn del Fine Gael dins las darrièras cinc annadas, a patit una revirada: a atengut lo 6,6% dels vòtes, del temps que fa cinc ans foguèt la segonda fòrça amb lo 19,5%.
 
La formacion qu’a governat mai d’annadas l’estat liure d’Irlanda, lo Fianna Fáil, nascuda en 1926 d’una scission del Sinn Féin, a recuperat de posicions après un de sos piègers resultats, fa ara cinc ans. Aviá atengut alavetz lo 17,5% dels vòtes mentre que, divendres, arribèt al 24,3%. Los candidats independents an obtengut tanben un sosten estonant: son la quatrena fòrça, amb 13% dels vòtes.
 
Lo parlament aurà tanben una representacion minoritària dels Verds, l’Aliança Antiausteritat, lo Partit Socialdemocrata e l’Aliança Independenta (un gropament de candidats independents).