Actualitats
Se son pas poguts defendre perque parlavan pas francés
Condemnan dos joves bretons a pagar d’emendas de 1000 e 1500 èuros
Dijòus passat se debanèt a Roazhon (Bretanha) lo jutjament contra dos joves per aver pintat un panèl estradièr qu’èra solament en francés. Los joves, que negavan los faches en breton, se poguèren pas defendre perque se lor neguèt lo drech a un interprèt. Son estats condemnats a d’emendas de 1000 e de 1500 èuros.
Dijòus passat se debanèt lo jutjament contra los dos joves bretons, que ne parlàvem dimenge passat tant dins l’editorial coma dins una nòva, per aver pintat un panèl estradièr pendent lo mes de març passat.
Coma o avián ja anonciat, los joves s’exprimiguèron unicament en breton. Aital o avián fach a l’interpelacion e amb la polícia.
Mas la jutgessa, Martine Lebrun, en un acte de supremacia lingüistica, diguèt als prevenguts qu’avián lo drech de s’exprimir en francés, mas qu’avián egalament lo drech de se calar se desiravan pas parlar “la lenga de la Republica”.
Yoann Colas e Corentin Lemonnier, que negavan los faches pels quals èran jutjats, aguèron pas drech a la paraula dins lo lor jutjament, en essent condemnats a d’emendas de 1000 e 1500 èuros.
“Las vòstras bestiesas ja an costat mai de 1000 èuros als contribuents, volètz de mai qu’eles paguen per un interprèt en breton? Una lenga qu’avètz quitament pas aprés dins las vòstras familhas…”, çò diguèt la presidenta del tribunal, Martine Le Brun.
Lo jornal numeric 7Seizhdescriu plan l’ambient d’aquel jutjament.
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#1 Que credí que la justícia internacionau èra la justícia deus vencedors, deus imperialistas.
Los dos joves Bretons s'i son mal preses per se far plan entendre. An causit d'emplegar la lenga de la Republica Bretona. Auriá benlèu degut emplegar la lenga d'ETA o de FLNC per se far ausir melhor ?
Violéncia l'erradicacion de las lengas istoricas de cada pòble, violéncia l'escafament public d'aquestas lengas sus l'aficatge public e la senhaletica, violéncia l'erradicacio nescolara d'aquestas lengas, violéncia encara lo refús de ne préner la dmiension oficiala en compte. Unes s'indignan de la violéncia dels unes o dels autres. Los Bretons, los Occitans, los Catalans, eles, non tuan pas… Pagan e se baton sus terrenc de la lei.
Caldriá poder assignar l'estat francés al tribunal penal internacional per segregacion linguiïstica e los obligar a pagar daumatges e interèsses a las doás victimas d'aquela segregacion racista. Far pagar a l'estat, sabi ppas, ieu, tè : 1000 e 1500 € e, en mai d'aiçò, los assignar a pausar panèls sinhaletics en bretons a l'endreit que los joves s'i faguèron préner. Es tant impossible qu'aquò ? Cossí se sasís lo tribunal penal internacional ?
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari