Aguèt luòc ièr una vesita istorica del president estatsunidenc Barack Obama a Cuba. Dempuèi que lo president Kennedy, al començament dels ans 1960, ordenèt lo blocatge de l’illa, cap de president dels Estats Units aviá pas vesitat L’Avana. Obama i anèt ièr, dins lo procès de retorn a la normalitat diplomatica entre los dos païses.
 
La visita d’Obama, justament  per son caractèr istoric, compren una molonada de gèstes e de detalhs. S’amassèt ièr amb lo president Raúl Castro, que l’aviá ja saludat a las funeralhas de Nelson Mandela, mas se reüniguèt tanben amb un grop de dissidents, e faguèt un discors dins lo teatre Alicia Alonso davant plusors politicians cubans. Assistiguèt pereu a una partida de beisbòl –una passion nacionala dins los dos païses–qu’una seleccion de jogaires cubans i afrontèt los Tampa Bay Rays.
 
 
Desclassificacion d’archius de la dictadura argentina
 
Après Cuba, Obama viatja en Argentina. E mai s’es pas una vesita istorica, aurà ben d’implicacions importantas. La relacion dels Estats Units amb los Kirchner èra pas brica bona, e en mai d’aquò, Obama anonciarà la desclassificacion dels documents que demòstran lo sosten dels Estats Units a la dictatura d’Argentina. Justament, aquesta setmana se complís lo 40n anniversari del còp d’estat militar de 1976, qu’ocasionèt una dictadura militara que semenèt la terror en Argentina pendent sèt ans.