Despuèi sèt ans, l’IEO a mes en plaça un cors d’occitan au Vau (Brinholenc). Lei promiers cors se faguèron dins un canton deis ancians locaus de l’ofici dau torisme puèi, rapidament, en rason dau nombre d’escolans, dins una sala prestada per la comuna.

I a cada an un dotzenau d’escolans, que venon pas solament dau Vau mai tanben d’autrei comunas dau relarg (Brinhòla, Sant Maissemin, Càrcer).
 
Mai lo cors es amenaçat per la rintrada en rason dei règlas novèlas que la municipalitat a votat. Efectivament, per respòndre ai degradacions constatadas dins lei salas, es estat votat d’impausar ais associacions que vòlon una sala una demanda uech jorns avans, amb un estat dei luecs avans e après e lo versament d’una caucion.
 
Aquò es segurament ben per una demanda de sala pontuala, mai complica lei causas per un usatge setmanier: i a ja totei lei formalitats, mai tanben lo risc de pas aver la sala... Per certaneis associacions, que seis intervenents rèstan pas dins lo vilatge, es pas solament pensable! Per exemple l’Associacion d’Ajuda ai Victimas d’Accidents e d’Agressions, que son responsable demòra a Ieras, 55 quilomètres mai au sud.
 
Doncas, leis activitats d’un bèu nombre d’associacions s’atròban amenaçadas. Lei reaccions son nombrosas: l’IEO a mandat un corrier a la consolessa, una autra associacion a demandat una entrevista e lo 20 d’avost se tendrà un acamp dei responsables associatius per promòure una accion comuna.
 
De seguir...
 
 
 
 
Reinat Toscano