Duquessa d'Aquitània, èra rèirefilha de Guilhèm de Peitieus, lo primièr trobador. Educada, dempuèi son enfança, dins la musica e dins la literatura, possedissiá un caractèr rebèl que la faguèt se revoltar contra lo ròtle qu'avián las femnas de son epòca, en tot revendicar sa condicion de femna e en tot dirigir sa pròpria vida, sens se sometre a cap d’òme, e mai se foguèsse lo rei de França o d’Anglatèrra o lo quite Papa de Roma, a qui faguèt valer sos dreches per Duquessa d'Aquitània, la màger feudatària de França, per anar a las crosadas coma los autres senhors feudals, en tot obténer de partir fin finala a la Crosada.
 
Foguèt reina de França per son maridatge amb Loís VII e tanben d'Anglatèrra per son segond maridatge. Maire de Ricard Còr de Leon e de Joan Sens Tèrra, governèt coma una femna d'estat pendent las abséncias del rei. Afogada de cultura, de Peitieus estant protegiguèt e promoguèt la lenga d'òc, la poesia e literatura trobadoresca de l’epòca, en mai de recuperar e de compilar las tradicions oralas a l'origina del mite del Rei Artús; las istòrias de Lancelòt e Persaval, e un poèma sus la legenda de Tristan e Isèut.
 
Una femna extraordinària, dotada d’una granda intelligéncia en mai d'una granda beutat e d’una requista feminitat, que la manteniá quitament quand practicava las arts que dominava a la perfeccion coma la falconariá, la caça, lo manejament de l’espasa e l’equitacion. Moriguèt octogenària, e jamai non perdèt sa sensualitat, son encant e sa feminitat pendent tota sa vida mentre qu'afrontava las desfortunas amb la valor e la determinacion que la caracterizavan. Mas amb un clar objectiu: defendre sas idèas e se far respectar coma femna dins un Mond dominat pels òmes.

Per aqueste motiu aqueste article es dedicat a aquela granda femna, que saupèt transmetre, de çò feminin enlà, un messatge de libertat. Perque, alara coma ara, i a pas de femna mai liura que la que lucha per defendre sas idèas.
 
 
 
Griselda Lozano
 
 
 
 

---

Aqueste article es adaptat del sit del roman Òc que fa la promocion d’Occitània e de l’occitan pel public ispanofòn.