Bandièra01 1180x150: Comuna de Tolosa

Actualitats

La Mediterranèa es un cementèri: 18 350 mòrts en batèl

La mòrt en barca de l’atlèta somaliana Samia Iussuf Omar ajuda a s’avisar de la tragica realitat de l’immigracion illegala

Diluns passat, los principals jornals italians raportavan la mòrt de l’atlèta somaliana Samia Yussuf Omar, plan coneguda per la corsa epica que faguèt als Jòcs Olimpics de Pequin (vidèo). L’esportiva moriguèt mentre qu’ensajava d’intrar illegalament en Euròpa per Itàlia.


Aquel fach nos ajuda a nos avisar que la Mar Mediterranèa es un grand cementèri. Fortress Europe calculèt, a partir de las nòvas jornalisticas, quantes son mòrts en ensajant d’intrar illegalament en Euròpa, e assegura que pas mens de 18 350 personas son mòrtas dempuèi 1988, dont 2352 arunan.
 
Las chifras son incompletas, solide, pr’amor que i a fòrça batèls perduts o aprefondats que degun ne sap pas res, quitament se sap pas quantas gents portavan. Alavetz aquela chifra es la minimala.
 
Dimenge passat, lo 19 d’agost, foguèt un jorn mai que mai dur; se trobèt un molon de mòrts en l’illa italiana de Lampedosa e qualques vaissèls a la deriva vèrs la Grand Canària. Lo 16 d’agost passat, dos mòrts apareguèron en Malta, tanben a la deriva, un dels biaisses mai comuns de morir. Qualques jorns abans èra aparegut mòrt, al pòrt de Venècia, un gojat amagat dins un contenedor. En julhet, se trobèt un vaissèl a la deriva près de Libia amb 54 cadavres, e mai una barca en Sicília amb tres. Tre lo començament de l’an i a agut de mòrts vèrs las còstas de practicament totes los estats mediterranèus, mai que mai de l’estat espanhòl, d’Itàlia, de Grècia, de Marròc e de Libia.
 
La majoritat dels mòrts son d’emigrants subsaharians qu’arriban en Senegal, en Marròc, en Tunisia o en Libia, los principals ponches d’ont ensajan d’intrar en l’UE per las Illas Canàrias, Ceuta e Melilla, Andalosia, Malta, Sicília e Lampedosa. En la Mediterranèa orientala i a tanplan un flux migratòri important, mas es puslèu per tèrra, per la frontièra turca. Ça que la, van cap a Grècia regularament amb de barcas; e n’i a tanben que van a cap a Albania, Itàlia o Croàcia. Las rotas son conegudas e los luòcs de partença tanben.
 
Lo mond que viatjan aital riscan pas solament la lor vida mas tanben los lors sòus. Un viatge relativament cort en barca (per exemple, de Marròc a Espanha o de Libia a Lampedosa) pòt costar qualques 400 o 600 èuros; amb un vaissèl de pesca, ont lo risc de morir es mendre, lo viatge pòt costar qualques 2000 èuros.

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alícia Montpelhièr
5.

#4 A quau profiècha, aquela creissença ? Als pèta-la-fam de Sahel ? M'estonariá…

  • 0
  • 0
garric
4.

Francament , la creissença economica africana es plan superiora a la d'Euròpa dumpièi un brieu. Qual sap se dins un sègle seràn pas los Europèus que se negaràn en assajar de tocar l'Africa...

  • 4
  • 0
Alícia Monteplhèr
3.

#2 Òu, tu, lo de Cuba, va-te'n veire subre leis isclas de Friol se t'i espère. E fai te pacient, vai… Aquò's un jjornau occitan, quicòm de seriós, qué.

  • 4
  • 0
Ernèst Guevara Jr. La Havana
2.

Ma doça Alícia, quita de bramar coma una Magdalena en balma ! Lo capitalisme e son neoliberalisme golbalista vèlhan a l'intersès vital dels migrants clandestins. Lèu, lèu, Euròpa serà tant apaurassida per la pression desumanisanta del neoliberalisme que i trobaràn pas mai ni proteccion sociala e sanitària, ni educaion a gratis per totes ; i trobaràn sonque, un emplec vergonhosament mal pagat per dos crèba la fam trevant de per carrièras, demèst de vièlhs tot magristèls que colcaràn defòra en esperant de petar de fred, de caut o talent, tota autra mena frutas de las politicas rigoristas amirant a la santa puta privatizacion de tot (e mai de l'aire que respiras, s'o pòdon metre al punt) e a la desreglamentacion dels còdis de trabalh.

Aquí, segur que baissarà, la migracion clandestina. De paurasses desesperats, ne morirà mens en mar !

Aquò rai, n'encambaràs mai per carrièras, mas aiçò una autra istòria. La del neoliberalisme trionfant dels non-elegits europèus. Per se n'avisar, aital coma vira ara per ara, se non i a susmauta radicala e presa de poder pel pòble unilateralament, t'aconselhi d'anar vistalhaar la nòstra maire a totes, Grècia, d'aicí a dos ans, per o entendre melhor.

Plan lo tieu.

  • 2
  • 1
Alícia Montpelhièr
1.

Fau pas s'estonar mai qu'aquò ! Fasèm petar la fam a tota Françafrica e nos pavanam sus la riquesa que ne tiram. Ne vòlon un bocin, pecaire, fins a ne riscar de crevar. E mai manca pas d'arribar !

  • 3
  • 0

Escriu un comentari sus aqueste article