Bandièra01 capçalera  1180x150: Novestivada

Actualitats

crotz-tolosaCreated with Sketch.GasconhaArmanhacBaish Armanhac

An vojat l’estanh del Morar (Bas Armanhac)

L’atemptat pòt èsser provocat per de païsans malcontents de la politica d’aigatge dins lo parçan

| Google Maps

A Averon e Bergela (Bas Armanhac / Baish Armanhac), l’Estanh del Morar, crompat en març passat pel Conselh General de Gers, subiguèt una fòrta agression pendent la dimenjada. Qualques individús vogèron l’estanh abans de metre fuòc a una cabana de pesca, qu’en plena canicula aquò auriá pogut provocar un desastre mai grand. L’estanh es un petit patrimòni rural del sègle XVIII e lo desastre ecologic es considerable: son mòrts qualques milièrs d’aluims, de milièrs de carpas, d’anguilas e de tartugas protegidas.


Fasiá mens de cinc meses que lo Conselh General de Gers aviá crompat aqueles 37 ectars de natura, plaçats dins la zòna Natura 2000 dels Estanhs d’Armanhac, amb la tòca d’i enregar un programa de valorizacion pedagogica e de sensibilizacion de l’environament.
 
Segon d’informacions de Sud-Ouest, l’estanh a perdut entre 50_000 e 100_000 m³ d’aiga a causa de l’atac. Un païsan retirat del vilatge vesin de Cravencèra, e amorós de l’estanh, descobriguèt lo fach dimenge passat.
 
Lo cremalh idraulic qu’acciona l’esparsièr de vojança del lac foguèt torçut per que se poguèsse pas arrestar l’assec. Calguèt alimentar l’estanh a partir del lac de Sant Joan per pèrdre pas tota la populacion piscicòla.
 
L’atemptat, benlèu l’auriań provocat qualques agricultors malcontents de la politica d’aigatge dins los parçan. Suls murs de la petita bastissa incendiada, los vandals avián pintat en francés “D’aiga per las tartugas” e “Martin, ne pòdes crompar un autre”, en allusion a Philippe Martin, deputat de Gers pel PS.
 
Aqueles actes venon qualques oras après un nòu decret de la prefectura que restrenh l’usatge de l’aiga a causa de la secaresa e de l’episòdi canicular.
 
Ja a la fin de julhet, après un primièr decret de restriccions vengut del ministre de l’Agricultura, i aguèt d’actes de vandalisme coma metre fuòc a la pòrta de la tresaurariá de Riscla.
 
La polícia scientifica es a trabalhar.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article