Bandièra01 1180x150: Comuna de Tolosa

Actualitats

Nadant amb de làmias: las causas mai alarmantas del mond de las finanças

“A Londres, i ai rescontrat lo catolicisme sens infèrn. S'ès una banca, tombaràs pas jamai. Es fòrça estranh! Es coma jogar a la roleta russa amb lo cap d'un autre”

Lo jornalista olandés Joris Luyendijk, èra estat correspondent de guèrra en Orient Mejan. Mas li arribèt la comanda d'investigar lo sector financièr, e per n’aprene se desplacèt a la City de Londres, lo quartièr financièr mai important del Mond amb lo novayorqués Wall Street. Antropològ de formacion, Luyendijk se centrèt mai sus las istòrias personalas dels banquièrs e lors emocions que suls aspèctes tecnics de la banca, e après demorar dos ans amb eles a Londres e n’entrevistar mai de dos centenats, a publicat lo libre Nadant amb de làmias.
 
Lo libre dobrirà los uèlhs del legeire al mond dels banquièrs e ajudarà a comprene las rasons de la crisi financièra.
 
Lo libre, traduch en catalan, se presentèt dimars passat a Barcelona. L’autor ofriguèt una conferéncia de premsa fòrça interessanta davant un quinzenat de jornalistas, que Vilaweb ne publica la transcripcion. (La podètz legir aicí traducha en occitan amb lo traductor automatic de la Generalitat de Catalonha)
 
“Çò que m’a emai estonat es que lo sector financièr es fòrça mai perilhós que pensavi. Fòrça gents dins las bancas m’an dich que l’an 2008, quand la crisi espetèt, telefonèron a lor calinhaire per lor dire de causas coma aquestas: «Crompa tant de manjar coma poiràs, tira tot l’argent de la banca e crompa d’aur; prepara los enfants, partissèm a la campanha». I a quitament d'informacions de banquièrs que crompèron d'armas. Que lor fasiá paur? Que lo provesiment arribèsse pas als supermercats, a las estacions de gasolina ni mai a las farmacias. Ni manjar, ni gasolina, ni medicaments. Èran vertadièrament espaurits que se passèsse una causa aitala. Puèi, de foncionaris de naut rang de l'Union Europèa explican que foguèron fòrça suspreses qu’aquò se passèsse. Plan suspreses. E als Estats Units Paulson, lo ministre de las finanças, parlava per telefòn amb sa femna del temps qu'ela li legissiá la Bíblia. Sabián pas qué far. Avèm creat un sistèma economic que quand se saturarà destruirà tota la societat. En qualques jorns, segur. E per tant los politicians poguèron pas far res mai que dire a las bancas: «Vos inquietetz pas, nosautres prenèm en carga lo vòstre deute»”.
 
“Qual es ara lo grand problèma d'Euròpa? Lo financièr. E los banquièrs i jògan un ròtle clau. Car ne sabèm pas practicament res. Es per aquò qu’ai escrich las istòrias a travèrs dels uèlhs dels banquièrs”
 
“A Londres, i ai rescontrat lo catolicisme sens infèrn. S'ès una banca, tombaràs pas jamai. Es fòrça estranh! Es coma jogar a la roleta russa amb lo cap d'un autre.”
 
“A la City las bancas començan amb un 50% d’òmes e un 50% de femnas. Mas quand las gents an 45 ans, ne demòra pas cap, de femna. Ai ausit d'istòrias de banquièras que parlavan de trabalh per telefòn pendent la jasilha!”
 
 
 


— LUYENDIJK, Joris. Nedant entre taurons: El meu viatge al món dels banquers. Editorial Empúries 2016. 272 pàgines. 19,50 èuros.  (Traduch per Ernest Riera Arbussà e Esther Roig Giménez)
 
— LUYENDIJK, Joris. Dit kan niet waar zijn. Atlas Contact, 2015. 208 paginas. 19,99 èuros.
 
 
 

           
           

           
                                  
Joris Luyendijk

                                  

Un viatge al·lucinant al món de les altes finances, un dels més complexos i secrets.


           

           

           

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma de mallorca
1.

Los banquiers descrits amb precision coma son: jugaires sense escrupols amb la vida dels trabalhadors

  • 1
  • 0

Escriu un comentari sus aqueste article