Lo parlament grèc aprovèt dimenge passat las mesuras exigidas per l’Union Europèa e lo Fons Monetari Internacional, especialament una reforma que fa davalar una granda partida de las retiradas e qu’aumenta las taxas dirèctas e indirèctas. Ansin lo govèrn de Tsipras cèrca que los creditors apròven l’amplificacion del tresen salvament economic del país.
 
Lo vòte de las mesuras s’acompanhèt de dos jorns de cauma generala e d’importantas manifestacions contra lo govèrn, mai que mai a Atenas e Tessalonica. La legislacion aprovada dimenge pel parlament grèc entraïna d’economias de 5,4 miliards d’èuros per l’estat e se deviá aprovar abans lo diluns, jorn que se tenguèt la reünion de l’Eurogrop.
 
Tsipras defendèt la reforma de las retiradas dins lo parlament en afirmant qu’e mai se s’agís d’una mesura que va contra los qu’an patit mai l’austeritat, es indispensabla per evitar la falhida de l’estat grèc.