Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc NautTolosan

Tolosa: inauguracion del Collègi Calandreta

Se tròba al numèro 5 de la carrièra David Erbaz dins una bastissa de la Comuna, dins lo quartièr de Belmont

| Jordi Ortiz de Antonio
Lo primièr Collègi Calandreta de Tolosa foguèt oficialament inaugurat aqueste dimars 24 de mai. S’agís d’una celebracion diferida pr’amor qu’aquel establiment d’ensenhament segondari comencèt de foncionar fa tres ans.
 
Participèron a l’eveniment de figuras politicas de primièra linha, coma l’elegit de la nòva macroregion pels afars occitans Patric Roux, e son predecessor a la carga Guilhèm Latrubesse, e lo president del Conselh Departamental de la Garona Nauta Georges Méric. Del costat municipal i assistiguèt lo primièr adjonch al cònsol e destacat occitanista Joan Miquèl Lattes. Participèron tanben dos representants de Convergéncia Occitana e los dos copresidents de la Confederacion de las Calandretas.
 
Introduguèt los discorses Miriam Bras, cofondadoira de l’establiment, qu'èra ja estada abans la fondadoira de la Calandreta de Castanet, que ven de festejar sos vint ans. Bras prononcièt un mercejament efusiu a Mirèlha Dedieu, directritz en volontariat, que combina aquel prètzfach benevòl amb son trabalh de professora a la Calandreta de Garoneta. Lo mercejament de Bras foguèt estendut tanben a totes los membres de la còla, que foguèron fòrça aplaudits.
 
Puèi foguèt lo torn dels elegits, que lors discorses foguèron de mai en mai afogats, puèi que revendicavan lo besonh de recuperar la lenga del país. Joan Miquèl Lattes vòl far de l’occitan un “caval de batalha”, tant que “las Calandretas an un succès fòl”. Lattes expliquèt tanben qu'una convencion amb l’Acadèmia de Tolosa es estada signada per la creacion d’almens doas classas bilingüas per an.
 
Patric Roux remembrèt que la presidenta de la region, Carole Delga, s’es engatjada a dobrir dos licèus. “I a un voide entre lo primari e l'Universitat, es per aquela rason que nos manca de professors ben formats, nos cal començar per formar de bons professors que seguiscan tota l’escolaritat en occitan per que pòscan, puèi, formar plan los escolans”, çò diguèt en fasent referéncia a la precarietat dels pòstes de professor de Calandreta.
 
Après los parlaments i aguèt un aperitiu que los calandrons e lors parents ofriguèron a las autoritats, del temps que qualques professors mostravan los locals als futurs escolans e a lors parents. L’establiment se tròba situat al numèro 5 de la carrièra David Erbaz dins una bastissa de la Comuna, dins lo quartièr de Belmont, e i cabon tres salas d’estudi, una bibliotèca e una sala d’art per recebre un trentenat d’escolans.
 
Lo departament de la Garona Nauta comp, a l’ora d’ara amb 450 escolans repartits dins las Calandretas de Garoneta e Còsta Pavada a Tolosa, en mai de las escòlas de Murèth, Castanet, Santa Gabèla, Sant Joan le Nòu, Legavin e Vilafranca de Lauragués.  Dins la Federacion de Miègjorn Pirenèus i a 955 enfants escolarizats dins 18 escòlas e un collègi.
 
 
 
Mireia Baeta
Jornalista collaboradora de Ràdio Occitània

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
2.

N'hi hauria d'haver a tot arreu, a tots els pobles i viles d'Occitània.
Tot arribarà.
"El Tàrrega".

  • 2
  • 0
Pirolet
1.

Òsca pel collègi calandreta de Tolosa! Montpelhièr, Besièrs, Tolosa e Pau: se pòt començar de parlar d'un malhum de collègis calandreta.

  • 6
  • 2

Escriu un comentari sus aqueste article