Bandièra01 1180x150: Comuna de Tolosa

Actualitats

Rodés: se presenta l’edicion 2016 de l’Estivada amb de novetats e suspresas

Lo festenal se debanarà del 21 al 23 de julhet e presenta 3 seradas Carta Blanca

Los conselhièrs municipals Sarah Vidal (cultura) e Francis Fournie (joventut) an presentat l’edicion 2016 de l’Estivada
Los conselhièrs municipals Sarah Vidal (cultura) e Francis Fournie (joventut) an presentat l’edicion 2016 de l’Estivada | Estivada 2016
L’edicion 2016 de l’Estivada de Rodés, lo festenal interregional de las culturas occitanas, se debanarà del 21 al 23 de julhet dins la capitala de Roergue. Ongan, l’Estivada presenta doas creacions ineditas en invitant sus scèna d'artistas confirmats e de joves promesas de la scèna occitana.
 
Una de las novetats d’ongan al programa son las 3 seradas Carta Blanca distribuidas a Alidé Sans e Paulin Cortial per dijòus, a l’acordeonista Lionel Suarez e a Claudi Sicre pel balèti de clausura. “De seradas fòrça dobèrtas que deurián reservar de suspresas”, çò rapòrta lo Blòg Occitan de France 3.
 
De soslinhar la preséncia de Marilis Oriona, La Mal Coiffée, Gari Greu de Massilia e Bernard Combi, e encara una suspresa reservada a Claudi Martí, qu’a ja jogat amb Lionez Suarez. La memòria de Joan Bodon i serà presenta. Tanben cal remarcar la serada festiva que menarà Las Bombes 2 Bal ont se devon rescontrar Manu Théron, Xavier Vidal, lo duo Abela-Vidal. Es segur qu’aquí i aurà totjorn de suspresas.
 
Per çò qu’es de teatre, la Rampe-TIO presentarà son Molière d’Òc, e tocant al cinèma se projectarà, pagant, lo filme de Christian Philibert sus Massilia e Paisans de Roergue  de Piget. I aurà tanben un minifestenal, gratuit, de corts metratges en occitan. Lo collectiu Dètz serà present coma las annadas precedentas.
 
Lo festenal se debanarà sus divèrses endreches de la vila, e coma d’abitud, son epicentre serà lo vilatge occitan près de l’empont màger.
 
Pasmens, lo cambiament del director e de sa còla se remarca. I a pas pus de preséncia catalana, ni mai de representacion interregionala. Lo sit web del festenal ara es estacat al de la comuna de la vila e, per ara, se presenta unicament en francés. L’occitan a tanben desaparegut del programa e coma lenga de las comunicacions.
 
 
Programa dijòus 21 julhet
Programa divendres 22 julhet
Programa dissabte 23 julhet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francon Sant Joan
5.

Ara deuriá èsser sonada "La Étiveé".

  • 3
  • 0
Pirolet
4.

#3 E òc! es de crànher! Los jacobins fan coma los crancs. Quand sentisson un quicòm de resisténcia: un pas endavant e très endarrèr.

  • 16
  • 0
Eric 971 Sentann
3.

La lenga non servís mai per comunicar dins la còla comunala. Anóncia un festenal folcloric ?

  • 17
  • 1
pjm pjm
2.

enganat d'article, desolat...

  • 7
  • 0
pjm pjm
1.

Occitanie ! si fau vertadeirament Occitanie - Pays Catalan.
Tanben, Aquitaine, miladiu, e pas aqueth led Grand Sud Ouest dont miaça seriosament.
Provence-Alpes, end'acabar damb aqueth led acronime.

Soi suspres de véder que quitament a Jornalet lo debat pertòca pas que la region centrala. Me sembla l'enjòc en Aquitània es au mensh tant important. Dejà que som pas estats fotuts d'entrepachar la fusion damb una region non-occitana, si perdem lo nom mei d'aquò...

  • 10
  • 0

Escriu un comentari sus aqueste article