Un còp de mai, los favorits s'impausèron arser, a la fin de la fasa tornar deus quarts de finala. Chelsea, a onze contra dètz, joguèt amb los nervis dels sieus suportaires fins a la victòria finala (2-1). Los lisboetas pòden regretar l'eliminacion, après aver segotit lo colòs blau tota la segonda tempsada sens saber trapar los fialats. Raul Meireles, un ancian del FC Pòrto, acabèt dins lo temps addicional amb lo sòmi del Benfica. Los de Chelsea tornan en semifinala, pel sieisen còp en nau ans.
Lo Real Madrid, de son costat, n'aguèt pas de tesic per véncer los chipriòtas de Nicosia. Cada còp que volguèron, los blancs saupèron prémer l'accelerator, e quilhar lo lor jòc fòra de portada de l'Apoel. Se qualifican sens dòl, e se presentaràn coma favorits fàcia als baviereses, lo 17 d'abril.
Amb aquelas victòrias, esperadas e sens cap de sospresa vertadièra, los sòus triomfan: las quatre còlas que s'enfrentaràn en semifinalas se tròban en lo classament dels sieis clubs mai rics d'Euròpa. Sonque mancan pas lo Manchester United e l'Arsenal, d'aquel classament. Cap de sospresa, alavetz, quand vesem las resultas de las darrièras edicions: fòra del FC Pòrto (en 2004), totas las còlas victoriosas fasián partida d'aquel top 10 dels clubs mai rics. Serà encara lo cas ongan. Per la bèutat de l'espòrt?
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari