Bandièra01 1180x150: Comuna de Tolosa

Actualitats

An trobat 133 migrants mòrts davant las còstas de Libia

An pas pogut confirmar la nacionalitat de cap dels mòrts a causa de la manca de documents, mas se crei que la màger part son de subsaharians

Lo pòrtavotz del Creissent Roge en Libia, Jamis al Bosaifi, a confirmat dimenge passat qu’aquestes darrièrs jorns an trobat los cadavres de 133 migrants mòrts dins la mar davant la còsta de de la vila de Zuwarah. Aperaquí tres quarts de las victimas son de femnas. A l’ora d’ara an pas pogut confirmar la nacionalitat dels còrses a causa de la manca de documents, mas se crei que la màger part vendrián de l’Africa Subsahariana. Las autoritats creson que los migrants partissián de la vila de Sabraza amb la tòca d’arribar en Itàlia.
 
La setmana precedenta foguèt encara pus tragica. Almens 880 personas moriguèron quand ensajavan d’arribar en Euròpa. Pasmens la chifra seriá estada pus nauta se l’armada italiana aguèsse pas salvat una barca que fasiá la meteissa rota. Aquela barca portava 562 migrants e se reversèt quand èra en nauta mar.
 
Dempuèi lo començament de l’annada, mai de 40 000 migrants son arribats en Euròpa per la dicha rota de la Mediterranèa centrala, segon Frontèx, l’agéncia europèa de vigilància de las frontièras. Mai de 2000 personas son mòrtas  après partir de las còstas de Libia. La rota centrala es venguda la principala via per arribar en Euròpa après l’acòrdi entre l'Union Europèa e Turquia per barrar la rota grecobalcanica.
 
Segon la polícia italiana, los immigrants que partisson de Libia passan de setmanas en manjant qu’un còp per jorn mentre que son lotjats dins d’ostals pròche la còsta. Quand puèjan dins las barcas, que son dins de condicions deplorablas, sols recebon de corsets salvavidas los migrants qu’accèptan de menar las barcas. Las màfias que se consagran al trafec de las personas aprofièchan la corrupcion e l’incapacitat de l’estat libian d’impausar son autoritat.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma de mallorca
1.

Nos feren creire los de l'OTAN que farian la guerra contra Gadafi per posar a Libia una democràcia. Guanharen las eleccions los integristas e ara se moren de fam e estan pitjor qu'abans.

  • 0
  • 0

Escriu un comentari sus aqueste article