Una còla d’arqueològs a descobèrt de multiplas vilas medievalas non documentadas dins la zòna d’Angkor, en Cambòtja. Las vilas an una ancianetat d’entre 900 e 1400 ans e s’amagan dins la jungla espessa. Se crei que l’ensemble de las vilas poiriá aver una talha similara a l’actuala capitala del país, Phnompenh. “Avèm descobèrt de vilas entièras dins la selva que degun ne sabiá pas res. Es una descobèrta fòrça granda, tan granda coma Phnompenh”, çò afirmèt Damian Evans, l’arqueològ australian qu’a dirigit la descobèrta.
 
Las vilas las an descobèrtas en fasent un estudi aerian de la zòna amb la tecnologia lasèr. E aqueste diluns passat, ven de se’n publicar un long rapòrt dins lo Journal of Archaeological Science. Segon l’opinion de l’arqueològ, aquelas vilas èran densament pobladas e foguèron l’empèri mai grand de la planeta al moment de son zenit al sègle XII.
 
La descobèrta permet de pausar de nòu las teorias sus l’evolucion de l’empèri khmer, la conquista de la region, e cossí desapareguèt a l’entorn del sègle XV. Servirà tanben per comprene quin ròtle aguèron dins aquel declin lo cambiament climatic e la gestion de l’aiga.