Bandièra01 1180x150: Comuna de Tolosa

Actualitats

Masèl omofòb a Orlando

Almens 50 mòrts e 53 ferits dins un club LGTB. Es la pièger fusilhada de l’istòria dels Estats Units

| REUTERS
Un òme fusilhèt la molonada dins una discotèca la nuèch de dissabte a dimenge a Orlando (Florida). Lo bilanç es d’almens 50 mòrts e 53 ferits, e se considèra qu’es la pièger fusilhada de l’istòria dels Estats Units. Lo tiraire, que teniá lo mond del local per ostatges, foguèt tuat per la polícia quand aquesta intrèt dins la discotèca. La polícia ara demanda la collaboracion de totas las personas qu’èran dins lo club per elaborar l’enquèsta. Lo cònsol màger d’Orlando demandèt als ciutadans que se tenguèsson units e fòrts davant aqueles moments complicats.
 
L’agressor seriá Omar Mateen, un ciutadan estatsunidenc de 28 ans d’origina afgana. De fonts policièras an explicat que Mateen aviá pas d’antecedents judiciaris. Segon qualques mèdias, Mateen poiriá èsser restacat al jihadisme. Dison qu’abans lo crime auriá telefonat a la polícia en tot aver jurat leialtat al cap de l’Estat Islamic Abu Bakr Al Baghdadi. Segon Reuters, l'Estat Islamic a revendicat lo chaple. La comunautat islamica de Florida a exprimit sa “ràbia e son chòc” pels eveniments.
 
Ça que la, lo paire del tuaire a demandat perdon pels actes de son filh e a dich qu’èran a causa de son omofobia, en ne descartant pas cap de motivacion religiosa. Segon lo paire de Mateen, son filh èra furiós dempuèi qualques setmanas pr’amor que l’assassin, acompanhat de sa femna e de son filh, aviá vist dos òmes que se potonavan publicament.
 
 
Omofobia
 
D'efièch, la fusilhada aguèt luòc dins un local nomenat Pulse, conegut e frequentat per la comunutat LGBT d’Orlando, especializat dins las fèstas gais d’estil latinoamerican.
 
Lo proprietari del sit, dins son darrièr messatge sus Facebook, avertiguèt de la situacion: “Que tot lo mond partiscan del Pulse e corran!”.
 
Segon lo testimoniatge d’una persona entrevistada sus Sky News, dins la sala i aviá de centenats de personas quand l’agressor se metèt a tirar. Al començament, los còps de fuòc èran dirigits vèrs lo plafon, mas après tirèt sus las gents. “Avèm ausit los còps de fuòc e nos sèm lançats sul sòl. Puèi, tot d’un còp, s’es fach lo silenci e sèm partits en tot córrer. La sala èra totalament plena”, çò afirmava. Segon la polícia, i aviá aperaquí 320 personas.
 
Lo president dels Estats Units, Barack Obama, planguèt lo dòl a las familhas de las victimas amb un comunicat. “Las nòstras pensadas e pregàrias amb las familhas e amb los èssers aimats de las victimas”, çò escriguèt lo President Obama.
 
La fusilhada se passèt qualques oras après l’assassinat de la cantaira Christina Grimmie, de 22 ans e èx-concurrenta del programa televisiu The Voice. La fusilhèt divendres passat un òme de 27 ans mentre que signava d’autografs. La cantaira veniá de far un concèrt dins una sala d’Orlando.
 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jig
22.

#20 N’àgitz pas nada vergonha deu vòste occitan, qu’ei perfèitament clar e coladís.

#20#21 D’acòrd dab tot aquò lhevat quauques detalhòts. Per exemple ne’m sembla pas que (la premsa, los politics, los comentators) s’i hèsquin generaument a minimizar la part omofòba, evidenta e indenegabla, de l’atac. Mes que deu depéner de qui comenta l’ahar — tà simplificar, lo GOP qu’insisteish sus l’islam e lo dret de s’armar, los democratas sus l’omofobia e la necessitat de limitar l‘accès a las armas.
Plan solide los atacs omofòbs non son pas reservats aus islamistas, be se’n manca; e los omofòbs de dreta extrèma qu’an generaument l’islam en òdi.
Tant i a que lo Mateen èra a la crotzada* de l’islamisme e de l’omofobia dab tanben, a çò qui sembla, ua bèra triscamalha de problèmas identitaris personaus. A minima que pòdem díser la mescla qu’èra explosiva.

E òc-ben, los omofòbs jihadistas de uei be deurén léger Abó Nauàs; que’us desclucaré lhèu l’esperit — o mei probablament, malaja, que cremarén los sons libes. (Mes tè : segon dauvuns desertaires de Daesh, las practicas omosexuaus que i serén çò de corrent…)

(*Shens maishant jòc de paraulas.)

  • 2
  • 0
Ibn Khaldun
21.

#19 Lo combat es efectivament pas "nosautres" contre "los musulmans", mas ,dempèi la debuta de l'ominizacion, e mai que mai dempèi a debut de la civilizacions sumeriana e egipciana (entre autra) la lucha de l'intelligénica de viure amassa conta la bestiesa de l'ingorança. Rapelarai que l'especificitat de la poesia musulmana andalosa, en defòra de sa lenga classica, plan segur, es qu'un tèrç dels poètas musulmans d'aquel periòdi èran omosexuals o bisexuals e que n'èran pas mens musulmans que los autres… Lo dihadisme non es pas l'islam,aitant segur coma l'inquisicion non es pas lo cristianisme.

  • 3
  • 0
Francon Sant Joan
20.

Me desencusi per mas errors en mos escrichs. Mon parlar mairal es l’espanhòl pòrtorrican (lo mot “pòrtorriquenc” seriá pus pròche a nòstre parlar). Parli e compreni tanben pro de anglès estatsunidenc mas soi pas un parlant nadiu. Es pas mon afar de pelejar. Lo tuaire Omar Mateen èra islamic e provablement islamista radical. Mas el li jurèt sa leialtat a Hisbullà e Al-Caída (la rason de la recerca del FBI contra el) e après a Daesh (pendent la quita tuariá) que son de organizacions enemigas. Lo quite president Obama diguèt que lo tuaire èra pas pròche o aliat de aicestas malhums terroristas. Denegi pas que foguesse terrorisme lo masèl e que sos cresenças religiosas foguesson pas dins las rasons que prenguèt per son òrre acte. Ça que la, sembla que l’òme èra omofòb, mas aviá quitament desirs omosexuals (el aviá de perfils en Grindr, Jack’d e Adam4Adam segon las nòvas e visitèt Pulse pendent 3 ans abans lo masèl). Mas es politicament aisit dins los Estats Units e Pòrto Rico parlar d’un màsel terrorista islamista e amagar que lo masèl foguèt omofòba. Lo Partit Republican estatsunidenc a una guèrra culturala contra las minoritats sexualas, lo Partit Democrat vòl enebir la venda liura d’armas (la “Segonda Amenda” = Second Amendment: lo drech a téner e portar armas). Mas, los mòrts e ferits en Orlando foguèron en su majoritat gais, èra una discotèca del “ambient” (ambiente en espanhòl), 23 dels mòrts èran jovents pòrtorricans, çò mond de mon país se sentisson desolats amb aqueste masèl. Volèm pas ésser tornarmai amagats e mespresats. Son 49 mòrts per son orientacion sexuala e aqueste òdi es promogut tanben per mantunas gleisas e mantuns politics e parents amb son masclisme. Qualques bèstias promoguèron lo “trending topic” en Twitter “matar gays no es delito”, s’en regaudent de la tuariá. La omofobia es encara un grand mal social e cultural, es pas solament una malautiá dels países islamics.

  • 2
  • 1
Jig
19.

#12 Un còp mei : arrés, nimei lo Trump, ne "desvian lo masèl omofòb al terrorisme jihadista". Centenats d’actes omofòbs e pro que son descriuts com omofòbs e pro, aqueste acte omofòb especific qu’èra TANBEN un atemptat jihadista, reivindicat coma tau, sus una cibla (los omosexuaus) formalament designada per Daesh.
Que la dreta americana (era medisha ultrareligiosa e suberomofòba) ac aprofieiti per avançar son agenda racista, qu’ei aule e, malaja, logic, mes ne càmbia pas la natura deus fèits.

Arrés tanpauc ne presentan l’omofobia o lo masclisme com un monopòli de l’islam. Mes lo fèit damòra "indefugible" que UEI LO JORN aqueth flèu ei especiaument engranat hens las societats musulmanas on seveish ua gran psicòsi puritanista.
Los islamistas n’arroeinaràn pas jamei l’occident : aquò’s un fantasma boharòc. Per contra ja son a vueitar de tota substància e ahonir hens la nueit las civilisacions islamicas, vielhas de bèths sègles e qui ac an tot entà celebrar l’amor de la vita, deus arts, de la sensualitat.
Pr’amor d’aquò lo combat n’ei pas "nos contra los musulmans" senon "la civilizacion contra los fanatics" e pr’amor d’aquò que cau emparar los qui defenen la libertat pertot, e mei que mei on son mei miaçats.
N’ac heram pas en denegar las realitats.

  • 2
  • 0
Jig
18.

#17 Non, non, qu’an tota la rason.
L’assassin d’Orlando n’èra pas jihadista, senon omofòb.
L’assassin de Magnanville n’èra pas jihadista, senon arpetofòb.
Los Kouachis n’èran cataguelofòbs e lo Coulibali, caisherofòb.
Los Tsarnaievs qu’èran maratonofòbs.
De fèit lo jihadisme, aquò n’existeish pas, non i a pas que destimborlats drindetotofòbs.

Ajusti : lo jutge qatari n’a pas aplicat ua lei islamica, qu’ei simplament neerlandofòb (http://www.jornalet.com/nova/6949/qatar-condemnada-a-un-an-de-preson-una-torista-olandesa-que-denonciet-esser-violada).

  • 1
  • 0

Escriu un comentari sus aqueste article