Bandièra01 capçalera  1180x150: Novestivada

Actualitats

Dimars de manifestacions e de violéncias contra la lei El Khomri

Mai de setanta personas foguèron detengudas dins l’estat francés en una seguida de protèstas contra la reforma del còde del trabalh

| @manelmarquez
Almens 58 personas foguèron detengudas, e 40 foguèron feridas, ièr a París a causa de las susmautas que se debanèron durant la manifestacion contra la lei de la reforma del còde del trabalh, segon de donadas de la polícia. Las autoritats an denonciat d’accions de “violéncia e degradacion” menadas per “d’individús encagolats”, e sus son compte de Twitter, la prefectura de polícia a publicat divèrsas fòtos que mòstran de joves amb lo cap cobèrt que getan d’objèctes suls agents e que destruson lo mobilièr urban e de veirinas de las botigas.
 
Qualques manifestants denoncièron sus Twitter que la polícia empleguèt de canons d’aiga, en mai de gases lacrimogèns e de matracas.
 
La Tor Eiffel, una de las principalas atraccions toristicas de la vila, barrèt sas pòrtas pr’amor que los salariats an seguida la cauma.
 
Los manifestants, que se comptavan per milièrs, mai d’un milion segon la CGT, protestavan un còp de mai dins una fòrta preséncia policièra contra la reforma del còde del trabalh, la nomenada Lei El-Khomri. D’autras manifestacions se debanèron per tot l’estat francés, e lo nombre de detenguts es almens de 73 en total. Segon los sindicats, 1,3 milions de personas an manifestat aqueste dimars dins tot l’exagòn, e mai se las autoritats rebaissan aquela chifra a 125 000.
 
En Occitània, los manifestants se comptavan tanplan per milièrs. A Tolosa an manifestat entre 6000 e 20 000 personas, segon las fonts; e a Marselha, entre 5000 e 140 000, tanben segon las fonts.
 
 
Aprovada sens lo vòte del Parlament amb l’estratagèma del 49.3
 
La polemica reforma del trabalh s’aprovèt l’11 de mai passat sens lo vòte del Parlament, gràcias a l’estratagèma de l’article 49.3 de la Constitucion. Una reünion extraordinària del conselh dels ministres aviá autorizat la velha lo primièr ministre francés Manuel Valls a recórrer al 49.3. Aquel article permet al govèrn d’engatjar sa responsabilitat sus un projècte de lei. Se cap de mocion de censura es pas votada, lo tèxt es adoptat sens cap de formalitat.
 
Aquel estratagèma foguèt ja emplegat pel govèrn Valls per aprovar la Lei de liberalizacion economica, coneguda coma Lei Macron.
 
 
La reforma del còde del trabalh
 
Dins la linha de çò que marca la tròica, aquela reforma ditz voler “protegir los salariats, favorir l’emplec e donar mai de marge de manòbra a la negociacion en entrepresa”. Dins la practica, manten la setmana de 35 oras, mas facilita los licenciaments, permet d’esperlongar la durada de la jornada de trabalh sens besonh d'acòrdi amb los trabalhadors, e permet de far demenir la remuneracion de las oras suplementàrias.
 
Los sindicats refusan quitament la nòva version que lo primièr ministre Manuel Valls presentèt lo 14 de març passat, en seguida de fòrça protèstas e d'una autra jornada de cauma generala que mobilizèt mai de 250 000 personas segon los principals mèdias. Aquela rescritura a pas convencut los sindicats: la CGT e l’UNÈF mantenon lor oposicion. En mai d’aquò, lo patronat, representat pel MEDÈF, qu’èra en favor del nòu projècte de lei, ara se ditz decebut.
 
Valls presentèt una version “corregida” de sa proposicion de lei, coneguda coma “Lei Trabalh” o “Lei El Khomri”, amb qualques cambiaments. Lo mai remarcable seriá que lo barèm que deu limitar las indemnitats per licenciament serà solament “indicatiu”.
 
 

 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma de Mallorca
2.

Los trabalhadors han dret a defensar sos drets laborals, e los gotsilas antidistrurbis a las ordres de lo govern messorguier fan la feina bruta brutalment.

  • 0
  • 0
Ernèst Guevara Jr. L\'Avana
1.

Sens violéncia, non obtendrem ren mai. Las urnas de votaciosn son vengudas trapèlas per nos enclavar totes, coma se ne foguèssem consents, dins de programaticas politiicas de dreita dura, independentament de la color majorit)ria de las nòstras votacions. las politicas impausadas de grat o de fòrça son de dreita, e demòran capudament e mespresosament a dreita. Las solas causidas ciutadanas son donadas entre dreita complexada o dreita descomplexada. Se quora votam non sèm pas mai entenduts, o farem tot petar, o tombarem lèu lèu esclaus descerebrats ! La dreita impausada de fòrça a un pòble d'esquèrra es una violénica. Los Occitan, n'avèm pro d'èsser mespresats. Mas los ciutadans del mond sancèr, n'avèm tanplan pro d'èsser mespresats.

  • 3
  • 0

Escriu un comentari sus aqueste article