Bandièra01 1180x150: País Invisible

Actualitats

Nom de la region centrala: una peticion demanda que lo nom siá tanben en occitan

de representants del mitan politic e social, partisans del nom “Occitània” per la region, son arribats a un acòrdi amb los catalans, qu’èran partisans del nom “Occitània-País Catalan”
de representants del mitan politic e social, partisans del nom “Occitània” per la region, son arribats a un acòrdi amb los catalans, qu’èran partisans del nom “Occitània-País Catalan” | Lo blòg occitan de France 3

Una peticion demanda als elegits “la cooficialitat del nom en occitan e en catalan e de preveire las utilizacions comunas del nom novèl dins las tres lengas dins totes los documents e tota la comunicacion de la Region”. Eles causiràn aqueste divendres un nom per la region, qu’en setembre lo validarà lo Conselh d’Estat francés.


Lo futur nom de la region centrala, fruch de la fusion de Lengadòc-Rosselhon e Miègjorn-Pirenèus, es dins l’actualitat politica del país. Dins las declaracions e las pressions d’influir sus la causida que faràn los elegits aqueste divendres que ven, cal remarcar una peticion en linha que demanda que lo nom de la region, quin que siá lo que se causisca, siá tanben en occitan.
 
Los peticionaris remarcan que lo nom de la region “prendrà en compte l’identitat istorica e culturala de la contrada coma o an exprimit los ciutadans dins lor vòte”, e remarcan que “seriá important e significatiu de votar a l’encòp la cooficialitat del nom en occitan e en catalan e de preveire las utilizacions comunas del nom novèl dins las tres lengas dins totes los documents e tota la comunicacion de la Region”.
 
 
Acòrdi dels partisans d’“Occitània” amb los catalans
 
D’un costat se succedisson los comunicats de divèrses collectius que demandan que se respècte lo resultat del vòte, qu’a causit lo nom d’Occitània amb una majoritat ampla, çò es un 45% dels vòtes.
 
En mai d’aquò, de representants del mitan politic e social, partisans del nom “Occitània” per la region, son arribats a un acòrdi amb los catalans, qu’èran partisans del nom “Occitània-País Catalan”. Eles acceptaràn lo nom “Occitània”, e en escambi “d’avançadas significativas dins la presa en compte de la «catalanitat» al sen de la nòva region”.


Lo nom “Occitània” serà validat
 
De son costat, Carole Delga, la presidenta de la nòva region, fruch de la fusion de Lengadòc-Rosselhon e Miègjorn-Pirenèus, validarà divendres lo nom d’”Occitània” per nomenar la region. Dins l’assemblada d’elegits que se tendrà per prepausar a París un nom per la granda region, la presidenta a manifestat qu’es impossible de “trapar” un nom que se siá largament impausat fàcia als autres noms dins un procès participatiu popular.
 
Ara, la presidenta entamena una sèria de dialògs e d’encontres amb los actors economics e politics de la region, qu’avián exprimit lors resèrvas sul nom d’”Occitània” per la region, e tanben amb los catalans per trobar una solucion consensuala.


 
Rousset: “Occitània se limita pas a una sola region”
 
De l’autre costat, divèrses collectius occitanistas planhon qu’una region prenga lo nom de tot lo país. Dins aquel sens lo president de l’IEO, Pèire Brechet, planhiá dins Aquò d’Aquí que “se reservar lo nom d’Occitània es una error morala”. En mai d’aquò, Brechet denonciava que lo nom d’Occitània es estat depausat a l’INPI, e donc l’emplec del nom del nòstre país “es justiciable”.
 
Tanben lo president d’Aquitània, Alain Rousset, afirmava a France 3 qu’“Occitània se limita pas a una sola region”. Dins aquel sens, Rousset remembrèt a France 3 qu’“Aquitània a pres sa part dins la politica lingüistica en favor de la lenga occitana”.
 
Enfin, Rousset desira que l’assemblada regionala reünida divendres que ven a Montpelhièr “prenga en compte aquel fach istoric d’un territòri de la lenga d’òc que se pòt pas limitar a una sola region”.
 
 
Peticion — Un nom en francés, occitan e catalan per la region

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jacme Pregond Narbona
7.

#6 òc, la suggestion es bona.

  • 1
  • 1
D\'Artanhan
6.

#5 E en tarbés, se la fòrma diferenta de la de Sent Gaudens ?

  • 0
  • 2
Jacme Pregond Narbona
5.

E en gascon, se la forma es distinta de l'occitan general, se vos plai.

  • 0
  • 2
L\\\\\\\'Alan Carcassona
4.

Deman, caldrà destriar Occitanas e Occitans (de l' Occitania granda)
del las Occitanianas e dels Occitanians de l'Occitania administrativa ?

  • 11
  • 1
Francesc Palma de Mallorca
3.

Es clar !

  • 0
  • 0

Escriu un comentari sus aqueste article