Bandièra01 1180x150: Comuna de Tolosa

Actualitats

Ais de Provença: de liceans presentan un filme d’animacion en 3D en occitan

Lo filme presenta de tèxtes occitans de l’Edat Mejana amb d’imatges qu’an l’estetica dels videojòcs actuals

Los escolans del Licèu Paul Cézanne d’Ais de Provença an fach un filme d’animacion 3D entitolat Lo dire dau papagai, segon çò que publica La Setmana. Lo filme presenta de tèxtes occitans de l’Edat Mejada amb d’imatges qu’an l’estetica dels videojòcs actuals.
 
L’òbra, facha pels escolans d’occitan de Didier Maurell, se basa sustot sus Las nòvas del Papagai, un tèxt del trobador Arnaud de Carcassés escrich al sègle XIII. A aquò s’apondon de citacions d’autres obratges dempuèi l’Edat Mejana fins al sègle XX: Trobar de Beatritz de Diá (sègle XII), Flamenca (sègle XIII), La miugrana entredubèrta [La mióugrano entre-duberto]  de Teodòr Aubanèu (1860), Ai trobaires catalans [I troubaire catalan] de Frederic Mistral (1876) e Dire de Robèrt Lafont (1957).
 
Lo filme es estat possible gràcias a un partenariat entre l’establiment, la region e l’associacion sextiana Kareron, que sa tòca es de promòure, difusar e comunicar a l’entorn de “projèctes artistics dins lei domenis de l’art, dau numeric e dei videojòcs”.
 
Las nòvas del papagai son la sola òbra coneguda d’Arnaud de Carcassés, e contan una infidelitat legitima, segon l’ideologia de la fin’amor. Explican l’istòria d’una femna embarrada per son òme gelós,  qu’un papagai la ven rescontrer per li far part de l’amor de son mèstre, Ciprian de Lormarin. Ne seguís una discussion per saber se la dòna li voldrà ben autrejar son amor.
 

 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alice C Clapas
2.

Oh fan es geniau aquò ! Rai que li mites fantastics passan ancuèi, entre autres, per li juòcs videos e ensins, l'istòria dau papagais (que coneissii ren dau tot) es fòrça agradiva de descubrir !

  • 0
  • 0
Pirolet
1.

Una capelada a aqueste trabalh dels joves!

  • 1
  • 0

Escriu un comentari sus aqueste article