Bandièra01 1180x150: Comuna de Tolosa

Actualitats

Lo Senat francés a aprovat una version fòrça mai dura de la Lei El Khomri

La defensa dels trabalhadors es ara fòrtament atacada a diferents nivèls

| Jackintosh
Lo Senat francés a aprovat aqueste dimars passat, per 185 vòtes en favor e 156 contra, la lei de la reforma del còde del trabalh. Mas los senators an votat un tèxte fòrça diferent del projècte de lei inicialament presentada. Examinat del 13 al 24 de junh, lo tèxte es estat reescrich en prigondor en tot aprovar una version encara mai dura pels trabalhadors. En una setmana los senators an completament tornat manejar la version de l'Assemblada francesa del projècte de lei portat per la ministra del trabalh Myriam El Khomri , çò qu'es normal vist que la majoritat senatoriala es de drecha.
 
Lo tèxte eissit del Senat es fòrça mai favorable al patronat. Especialament se deu remarcar qu'an abolit l'orari legal general de trabalh de 35 oras per setmana. En mai d’aquò prepausa que los oraris se determinen dins l'encastre d'acòrdi salariats/patron pròpris a cada entrepresa. En l'abséncia d'acòrdi, la durada de la setmana de trabalh serà de 39 oras. Al nivèl contractual, lo Senat francés vòl metre fin a l'obligacion pels patrons de signar de contractes d'almens 24 oras.
 
La defensa dels trabalhadors es fòrtament atacada a diferents nivèls:
 
— I aurà pas pus obligacion pels patrons de signar de contractes d'al mens 24 oras.

— Los comitats d'Igièna, Seguretat e Condicions de Trabalh seràn obligatòris sonque dins las entrepresas de mai de 100 salariats (contra los 50 actuals)

— En dejós de 20 salariats serà pas pus obligatòri d'organizar d'eleccions de delegats del personal (contra 11 salariats ara)

— Las indemnitats prud'omalas de licenciaments son plafonadas.
 
 
De protèstas socialas
 
Qualques centenats de milièrs de personas manifestèron un còp de mai per tot l’estat francés lor refús a aquela lei, aqueste còp dins una “colèra immensa”, çò podèm legir dins Le Monde.
 
Las protèstas se succedisson dempuèi lo començament de l’annada, e après la cauma generala del 31 de març passat, la contestacion sociala generèt lo movement dels indignats franceses nomenat Nuèch de Pè (Nuit Debout)
 
Aquela cauma se tenguèt jos la crida dels principals sindicats interprofessionals, de qualques organizacions d’estudiants e de fòrça collectius. Pasmens, los manifestants ocupan las plaças e i demòran de nuèch, dreches, de pè, tanben per protestar contra l’estat d’emergéncia e per sosténer d’autras luchas socialas. Per tant, lo movement es vengut una convergéncia dels movements ecologistas, antimilitaristas e d’autres ciutadans malcontents e decebuts per las politicas del govèrn de Manuel Valls; que denóncian quatre ans de mesuras liberalas e reclaman un cambiament.
 
 
Aprovada sens lo vòte del Parlament amb l’estratagèma del 49.3
 
La polemica reforma del trabalh s’aprovèt l’11 de mai passat sens lo vòte del Parlament, gràcias a l’estratagèma de l’article 49.3 de la Constitucion. Una reünion extraordinària del conselh dels ministres aviá autorizat la velha lo primièr ministre francés Manuel Valls a recórrer al 49.3. Aquel article permet al govèrn d’engatjar sa responsabilitat sus un projècte de lei. Se cap de mocion de censura es pas votada, lo tèxt es adoptat sens cap de formalitat.
 
Aquel estratagèma foguèt ja emplegat pel govèrn Valls per aprovar la Lei de liberalizacion economica, coneguda coma Lei Macron.
 
 
La reforma del còde del trabalh
 
Dins la linha de çò que marca la tròica, aquela reforma ditz voler “protegir los salariats, favorir l’emplec e donar mai de marge de manòbra a la negociacion en entrepresa”. Dins la practica, manten la setmana de 35 oras, mas facilita los licenciaments, permet d’esperlongar la durada de la jornada de trabalh sens besonh d'acòrdi amb los trabalhadors, e permet de far demenir la remuneracion de las oras suplementàrias.
 
Los sindicats refusan quitament la nòva version que lo primièr ministre Manuel Valls presentèt lo 14 de març passat, en seguida de fòrça protèstas e d'una autra jornada de cauma generala que mobilizèt mai de 250 000 personas segon los principals mèdias. Aquela rescritura a pas convencut los sindicats: la CGT e l’UNÈF mantenon lor oposicion. En mai d’aquò, lo patronat, representat pel MEDÈF, qu’èra en favor del nòu projècte de lei, ara se ditz decebut.
 
Valls presentèt una version “corregida” de son projècte de lei, conegut coma “Lei Trabalh” o “Lei El Khomri”, amb qualques cambiaments. Lo mai remarcable seriá que lo barèm que deu limitar las indemnitats per licenciament serà solament “indicatiu”.
 
Ara, lo tèxte aprovat pel Senat francés, es clarament a preparar lo camin per una eventuala mas anonciada victòria de la drecha a las eleccions presidencialas de 2017 dins la Republica Francesa.
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma de Mallorca
5.

La dreta francesa e europea encara es mai reaccionaria de lo que puga ser lo Partit socialista francés.

  • 0
  • 0
Ernèst Guevarra Jr. L\'Avana
4.

Lo Senat francés a aprovat una version fòrça mai dura de la Lei El Khomri. E qué faràn los "socialistas" (s.i.c;) de l'assemblada dita "nacionala" ? Benlèu votaràn contra, eles tanben ? Atal quitarà lo davant de scèna aquela puta de lèi dreitista…?

  • 4
  • 0
Jig
3.

Lo govèrn que s’amassa ua bèra batanada dab lo baston qui a hornit. Que cau esperar aqueth còp lo pòble que compreneràn n’i a pas arren d’esperar d’aquera clica e que daisharàn de voler l’alternança de las pigas e de las agaças.

#2 Un truc : entà virà’vs lo corrector, quan vólhitz escríver en òc passatz suu corrector anglés, en principi qu’ei hèra mei tolerant e n’assaja pas tant de v’impausar mots de son…

  • 1
  • 0
Felip Martèl Montpelhier
2.

Amusant de veire que lo PS an votat "contra" sus un texte que totun èra presentat per lors "collèges" dau govèrn Valls. Segur qu'an votat contra la version corregia per la drecha, mas es amusant totun.
Lo debat a l'entorn d'aqueu texte lamentable, trop mau preparat, pas pron debatut en amont, e pas solament de preferéncia amb los bons parroquians de la CFDT, trop tard présentat a la fin d'una legislatura, aqueu débat, dinqu'au somp, nos aurè donat envia de rire en meme temps que de plorar.
PS : n'ai una forra dau "corrector " ortografic que te compelis a tornar escriure ço qu'es estat adaptat en francés per aquela mecanica que rende ton texte incomprensible.

  • 3
  • 0
LACHAUD
1.

Viva la democracia emben un governament d'esquera!
Mas, crese ben que quò es los darriers jorns d'aquel governament e daus partits de governament tradicionaus
Degun espera pus tirar quauqu'a ren dau fonccionament de la politica.
Pensam aus interests daus occitans emben lo libre d'Alem Surre-Garcia : la teocracia republicana qu'es surtit au bon moment e laissam morir las vielhas idéias.

  • 7
  • 2

Escriu un comentari sus aqueste article