Bandièra01 1180x150: Comuna de Tolosa

Actualitats

L'estat francés es a vendre l'aeropòrt de Niça

L'estat francés a decidit de vendre sas parts, çò es lo 60% de la societat ACA, a un grop privat

En tèrmes de trafic, l'aeropòrt de Niça es lo primièr d'Occitània amb una frequentacion annala de 12 milions de passatgièrs e 170 000 movements d'avion. Aqueste complèxe aeroportuari es lo fruch d'una longa istòria que pren rasic a l'epòca dels pionièrs de l'aviacion. L'aeropòrt foguèt reconegut coma installacion permanenta en 1929. PrivateFly li guerdonèt lo prèmi "Apròchi mai polit" en 2014.
 
Aqueste aeropòrt se destaca tant dins l'istòria nòstra coma dins l'istòria europèa. Se pòt pas doblidar los imatges esmovents d'Alain Delon que i retròba Romy Schneider, o las tragèdias coma la del tsunami de 1979. Es doncas un element important del patrimòni economic e istoric dels occitans.
 
L'aeropòrt es gerit per la societat anonima Aéroport Côte d'Azur (ACA), totalament publica que l'estat n'es l'accionari majoritari (60% del capital). Lo 40% de rèsta son partejats entre la Cambra de Comèrci e d'Indústria locala, la Region PACA, lo Departament dels Alps Marins e la metropòli de Niça Còsta d'Azur.
 
Coma ja o aviá fach amb l'aeropòrt de Tolosa, l'estat francés a decidit de vendre sas parts, çò es lo 60% de la societat ACA a un grop privat. Atal çò qu'èra fins ara la proprietat collectiva publica dels occitans vendrà un simple objècte comercial dedicat al profièch capitalista. Aquesta dilapidacion del ben public ja se pòt criticar sul fons. Per çò de la forma, la Tribune d'Aix-Marseille desvela que l'estat fa una òbra autocratica en aver refusat de consultar las 4 collectivitats localas coaccionàrias d'ACA, contràriament a çò previst pel quasèrn de cargas. Recentament, Christian Estrosi, lo president de la region Provença-Alps-Còsta d’Azur, s'opausèt a la possibilitat que l'aeropòrt foguèsse comprat per un grop turc: "Vòli qu'aqueste aeropòrt demòre mai niçard que turc, saudita o qatari o quitament parisenc", çò aviá dit.
 
L'estat es ara a trabalhar sol sus l'apèl d'ofèrta. Sembla que los dos operators Vinci Airports e Atlantia son los favorits. L'estat donarà lo nom del crompaire d'aquí a un detzenat de jorns.
 
 
 
 
TL

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma de Mallorca
1.

L'estat se vol diners lo qu'ha de far es far una política pacifista e reducir las despesas militar.

  • 0
  • 0

Escriu un comentari sus aqueste article