An trobat mòrta dins lo lac de Lograta (Naut Agenés) la petita Carmen, una filha de 3 ans portada desapareguda dempuèi dimenge a 15 oras, çò rapòrta Sud Ouest. Una autopsia serà facha dins los jorns avenidors a l’institut medicolegal de Bordèu per confirmar l’ipotèsi d’una negada.
 
Dimenge de tantòst, l’enfantona desapareguèt quand se trobava amb sa mameta dins una zòna amainatjada que compren un camping e una plaja al bòrd del lac. La petita èra a la portada de vista de la grand-maire e desapareguèt de son camp visual. Après avertir los socorses e los gendarmas, comencèt la recèrca. La polícia tractèt aquel afar coma una “desaparicion inquietanta”.
 
Ara, lo gropament de gendarmariá del departament d’Òlt e Garona an lançat un apèl a totas las personas que se trobavan al lac de Lograta dimenge entre 10h e 15h per que lor manden de fòtos presas sus plaça a l’email photoslacdelougratte@gmail.com. En mai d’aquò, la gendarmariá del departament sauprà grat de totas las informacions qu’òm pòsca provesir sus aquel afar al telefòn +33(0)5 53 69 30 00.