Bandièra01 1180x150: Comuna de Tolosa

Actualitats

Bavièra: un refugiat sirian mòrt en far espetar una bomba dins la molonada

L’autor aviá 27 ans e li avián refusat l’asil arunan, èra en tractament psiquiatric e aviá temptat de se suicidar dos còps. L’atac a fach un dotzenat de ferits

Un refugiat sirian se faguèt espetar arser vèrs 22h a l’intrada d’un festenal de musica dins la vila bavaresa d’Ansbach. L’ataca a daissat un dotzenat de personas feridas, dont tres son grèvas mas lor vida es pas en perilh. Segon çò qu’an raportat las autoritats, l’autor aviá 27 ans e arunan li avián refusat l’asil. A l’ora d’ara, la polícia sap pas se l’òme aviá l’intencion de far un atemptat kamikaze, o se simplament la bomba espetèt quand la voliá pausar.
 
Lo ministre de l’interior alemand, Joachim Herrmann, a dich, dins una conferéncia de premsa, que l’òme èra en tractament psiquiatric e aviá ensajat de se suicidar dos còps. Herrmann a raportat que l’agressor aviá temptat d’intrar dins l’encencha del festenal de musica.
 
Hermann a tanben declarat que l’assalhidor portava un sac al moment de l’explosion, e per aquela rason lo personal de seguretat del festenal l’empediguèt d’intrar. D'aquel temps jogava Ian Anderson, lo cantaire de la banda Jethro Tull. Dedins i aviá aperaquí 2500 personas. Ansbach, de 40 000 abitants, es près de Nurembèrg e acuèlh una basa de l’armada dels Estats Units.
 
Herrmann a confirmat que s’agís d’un nòu atemptat, e s’escarta pas que siá una accion jihadista.


Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
2.

E l'Estròsi a pancara dich res sul sicut?

  • 0
  • 0
lo Muòl
1.

De pas doblidar lo dimenge 24 de julhet.. una ataca amb macheta que faguèt un mòrt:
http://www.lesoir.be/1274643/article/actualite/monde/2016-07-24/allemagne-un-mort-et-deux-blesses-dans-une-attaque-machette-photos

  • 2
  • 0

Escriu un comentari sus aqueste article