Bandièra01 1180x150: País Invisible

Actualitats

Lo primièr ministre irlandés demanda que “se considère” la possibilitat d’un referendum de reünificacion

Éanna Ó Coinnigh, del Fine Gael, èra pas partisan fins ara de prene en compte l’opcion d’una consulta

lo primièr ministre de la Republica d’Irlanda, Éanna Ó Coinnigh (en anglés Enda Kenny), a dobèrt la pòrta a un referendum de reunificacion amb l’Irlanda del Nòrd coma consequéncia de la sortida del Brexit
lo primièr ministre de la Republica d’Irlanda, Éanna Ó Coinnigh (en anglés Enda Kenny), a dobèrt la pòrta a un referendum de reunificacion amb l’Irlanda del Nòrd coma consequéncia de la sortida del Brexit | William Murphy
Pel primièr còp, lo primièr ministre de la Republica d’Irlanda, Éanna Ó Coinnigh (en anglés Enda Kenny), a dobèrt la pòrta a un referendum de reünificacion amb l’Irlanda del Nòrd coma consequéncia de la sortida del Reialme Unit de l’Union Europèa, lo Brexit. Es la demanda que lo Sinn Féin, a l’oposicion, fa dempuèi lo jorn après lo referendum del 23 de junh, que lo Reialme Unit votèt en favor d’abandonar l’Union Europèa mentre que l’Irlanda del Nòrd se prononcièt per i demorar.
 
Ó Coinnigh es lo cap del Fine Gael. Un dels dos grands partits de la Republica (l’autre es lo Fianna Fáil), lo Fine Gael es lo qu’a tengut tradicionalament una posicion mai refractària a la reünificacion de l’illa. Lo Fianna Fáil, per contra, s’es situat dins un angle mai republican e es partisan d’avançar devèrs l’unitat d’Irlanda, e mai se se fa gradualament.
 
“Las convèrsas e las negociacions que se debanaràn tre ara deurián considerar la possibilitat —e mai s’es alonhada— que la clausula de l’Acòrdi de Divendres Sant se pòsca activar”, çò a dich Ó Coinnigh.
 
La clausula que la mençona lo primièr ministre es la que prevei la tenguda d’un referendum per l’unificacion de l’Irlanda del Nòrd e de la Republica d’Irlanda.
 
“S’i a de pròvas claras que la majoritat de las gents [de l’Irlanda del Nòrd] vòl abandonar lo Reialme Unit e se jónher a la Republica, [aquela opcion] la caldriá satisfar dins las convèrsas que se debanaràn”.
 
 
Lo secretari d’Estat britanic ne vei pas lo besonh
 
Segon l’Acòrdi de Divendres Sant, lo secretari d’estat britanic per l’Irlanda del Nòrd pòt “ordenar” la celebracion d’un referendum d’unificacion se li sembla “probable” que la majoritat dels nòrd-irlandeses vòlgan abandonar lo Reialme Unit e se jónher a la Republica d’Irlanda.
 
Fins ara, cap de secretari d’estat a pas fach servir aquel poder. Totes los sondatges disponibles senhalan qu’una clara majoritat de nòrd-irlandeses refusariá l’unificacion amb la Republica d’Irlanda.
 
L’actual secretari d’estat, James Brokenshire, a dich que vei pas cap de besonh de convocar lo referendum après lo Brexit.
 
 
 
 
 
Aqueste article es adaptat de Nationalia amb qui Jornalet a un acòrdi de cooperacion.
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
2.

No és que s'ahuria de considerar, és que ja hauria d'esser una realitat!
L'Ernest, "El Tàrrega".

  • 0
  • 0
Adam Cargol Gruissan
1.

Encara que la fòrma Éanna Ó Coinnigh siá la que trapam mai correntament, lo nom irlandés mai exacte es puslèu Éanna Ó Cionnaith, tenent en compde que lo ministre es natural de la comtat de Mayo.

  • 0
  • 0

Escriu un comentari sus aqueste article