Bandièra01 1180x150: Comuna de Tolosa

Actualitats

Rugbi de XIII: Lo campionat Elèit 2016-17 pren forma

Los Dragons Catalans espèran un sosten bèl dels catalans e occitans units pel XIII!
Los Dragons Catalans espèran un sosten bèl dels catalans e occitans units pel XIII!
Sabèm ara qual jogarà la finala de la Cup a Wembley a la fin del mes, mas dobrirem aquesta cronica amb informacions sul debanament del campionat d’Elèit-1 per la sason novèla.
 
 
Dètz esquipas en Elèit-1
 
Los novèls dirigents de la Federacion dels XIII e los clubs d’Elèit 1 e 2 se son rescontrats aqueste dissabte de matin a Lesinhan. Ne ressortís que 10 formacions jogaràn en Elèit-1: las 9 de l’an passat e Sant Gaudenç. La Rèula a pas obtengut los sostens institucionals e financièrs per montar d’escalon.
 
La sason se dobrirà per una Dimenjada Magica los 24 e 25 de setembre a Carcassona o Perpinhan. Las partidas ont las esquipas seràn a egalitat aprèp 80 minutas se perseguiràn per un Punt en Aur (2 còps 5 minutas). 6 formacions seràn qualificadas amb las doas primièras dirèctament en mièja finala.
 
Lo campionat d’Elèit-2 se dobrirà a la debuta d’octòbre amb sa Dimenjada Magica.
 
Pas de Copa de Província mas dos afrontaments Èst-Oèst en junh a Montpelhièr e Tolosa son programats.
 
Los jorns de Richard Agar al cap de l’esquipa de França son comptats: una crida per l’entraïnaire dels Pols serà lançada al mai lèu que la Copa del monde de 2017 serà per la fin de l’an venent.
 
 
Tolosa cansa l’emplegat al planchòt
 
Dissabte, en Liga-Una, contra York City, lo Tolosa Olimpic prenguèt dins las 6 primièras minutas dos ensages, mas a la pausa los occitans menavan 24-10, per s’impausar fin finala 46-16 aprèp aver marcat en tot 8 ensages.
 
Partida venenta pels tolosans: lo 14 d’agost a Doncaster.
 
 
Dòna Cup aima la logica
 
La Cup anglesa a pas causit ongan la version “suspresa”. Son las doas formacions cap de fila de Super-Liga que se traparàn en finala, per una aficha inedita, lo dissabte 27 d’agost a Wembley: Hull-FC, venceire de Wigan 16-12, del costat de Doncaster e Warrington que s’impausa aisidament 56-12 contra Wakefield sus la pelena de Leigh.
 
 
Dragons: la partida de pas mancar
 
Aquesta fin de setmana, comença la segonda fasa de Super-Liga amb lo Super-8. L’atencion se cristalliza sus la quatrena plaça qualificativa que se van disputar Dragons e St-Helens, vist que se vei pas cossí Warrington, Wigan e Hull-FC serián pas qualificats e que demòra a Castleford, Widnes e Wakefield a faire una bona figuracion.
 
Los Dragons partisson amb dos punts de retard sus Sant-Helens que jòga a Warrington dijòus alara que los Sang e Aur reçaupràn Widnes dissabte a 6 oras del vèspre a Brutus. Las doas formacions se traparàn a Sant-Helens lo divendres 12: la quinzenada serà doncas decisiva pel sòrt dels catalans dins la competicion d’ongan. Costat catalan, s’espèran de dintradas e una motivacion refortida per sortir de l’espirala de las desfaitas.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article