Almens 13 personas mòrtas: es lo tragic bilanç de l’incendi del bar Cuba Libre de la vila de Roan, en Normandia. Las victimas son de joves entre los 18 e los 25 ans que participavan a una fèsta d’anniversari privada. Lo fuòc comencèt al sosterranh del local, segon çò qu’an raportat las autoritats. Lo nombre de ferits seriá almens de sièis, totes grèus.
 
La polícia a definit l’incendi coma “un accident”, que l’auriá pogut provocar una de las candelas de la còca d’anniversari. Lo fuòc se propaguèt rapidament a travèrs del sistèma d’isolacion sonòra del tech. “I a pas agut d’explosion, son las candelas utilizadas per una fèsta d’anniversari qu’an enflamat lo tet constituit de polistirèn, liberant de gases qu’an intoxicat las victimas”, çò declarèt la permanéncia del comissariat de la polícia de la vila a l’AFP.
 
Una cinquantenat de pompièrs participèron a l’extincion del fuòc e al socors de las personas, segon lo ministre de l’interior francés, Bernard Cazeneuve, qu’anoncièt que las autoritats avián dobèrt una enquèsta per esclarzir los faches.