Bandièra01 1180x150: País Invisible

Actualitats

Un fòrt tèrratrem al centre d’Itàlia a provocat almens 120 mòrts

Lo cònsol d’Amatrice a dich que la vila “existís pas mai”

Un fòrt tèrratrem de magnitud 6.2 a secotit uèi a 3h36 lo centre d’Itàlia, entre las regions de Laci e Ómbria, en causant, pel moment, almens 120 personas mòrtas e la destruccion de la vila d’Amatrice. Aquela donada es encara provisòria tant que los secorses son a cercar e savar los ferits que son atrapats dins los tarcums. L’Agéncia Italiana d’Informacions (AGI) rapòrta qu’a Pescara del Tronto i a un centenat de desapareguts.
 
Dins lo massís del Grand Sasso, als Apenins, i a agut de nombroses avalancaments de ròcas. Lo tèrratrem s’es sentit dins un airal que va de Nàpols a Rimini e tanben a Roma. Puèi, i a agut mai de 50 sismes mentre qu’òm los a sentits dins tot lo centre d’Itàlia.
 
Lo cònsol d’Amatrice, Sergio Pirozzi, a dich a SkyTG24 que la vila “existís pas mai”. Norcia, dins la província de Perugia, e Accumoli, dins la província de Rieti, son las autras vilas mai afectadas. Lo cònsol de Norcia, Nicola Alemanno, a explicat a la RAI que “los degalhs son innombrables” e que la glèisa de la vila s’es mièja esfondrada.
 
Los mèdias locals comparan lo sisme amb lo que patiguèt L’Aquila en 2009. Aquel tèrratrem de magnitud 6,3 tuèt 300 personas e devastèt la region dels Abruces, qu’es plan pròcha de l’epicentre actual.
 
Podètz seguir las informacions en dirècte sus la RAI, la television publica italiana, los principals jornals italians Corriere della Sera e La Repubblica, e lo principal jornal de la region Corriere dell Umbria.
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Sandro Algarve - Portugal
1.

Mês sentiments para tots os afectats por esta desgraça.

  • 8
  • 0

Escriu un comentari sus aqueste article