Bandièra01 capçalera  1180x150: Novestivada

Actualitats

En sovenir de Joan Pèire Belmon

Un an après sa mòrt, lo CEP d’Òc organiza una jornada a la memòria del jornalista occitan

| CEP d\'Òc
Lo 25 de setembre que ven farà un an que nos quitèt Joan Pèire Belmon, lo jornalista occitan que consagrèt sa vida a far parlar lo mond e servar la lenga. Lo 29 d’octòbre que ven, lo Centre d’Estudis de la Paraula d’Òc (CEP d’Òc) organizarà una jornada dedicada a sa memòria, “perque fuguèt nòstre amic, mai subretot perque nos laissava en eiretatge una òbra immensa de complir”.
 
La jornada se tendrà, doncas, dissabte 29 d’octòbre a l’Ostau de Provença d’Ais, amb la projeccion del filme Made in país, qu’Eric Eratostène realizèt amb Joan Pèire, e se partejarà los testimoniatges dels qu’avián trabalhat amb el e que contunhan son òbra. Puèi, lo cantaire Joan-Bernat Plantevin semondrà al public son espectacle Tant que vira fai de torns e se prendrà un aperitiu.
 
 
L’òme occitan de l’audiovisual en Provença
 
Joan Pèire Belmon èra en Provença l’òme occitan de l’audiovisual. Foguèt presentaire e productor de Vaquí, l’emission en lenga occitana de France 3 Méditerranée, pendent 20 ans. Abans èra estat òme de ràdio e aviá longtemps trabalhat a France Bleu Vaucluse. A Radio Vaucluse aviá inventat lo concèpte Escapadas, e a Vaquí aviá contunhat amb son modèl de magazine itinerant, per tota Provença e endacòm mai.
 
En 2013 Belmon aviá pres la retirada, e decidiguèt de dedicar son temps e son vam a la lenga occitana. Per qué cambiar? Foguèt elegit a la presidéncia del CEP d’Òc, Centre d’Estudis de la Paraula d’Òc, organisme que trabalha per la lenga occitana per mejan de l’audiovisual, creat a l’iniciativa del Felibritge, de l’Institut d’Estudis Occitans e de Parlaren (Parlarem).
 
 
Balhar la paraula e difusar la votz occitana
 
“Car cantam que per vautres, ò pastres e gents dei mas!”, çò aviá dich Mistral en 1859. Belmon, mai que de cantar los pastres, s’estimèt mai de lor balhar la paraula. Balhèt la paraula a de pastres, a de gents divèrsas de mases divèrses, a de traçaires de murs de pèira seca, a de cantaires, a de musicians, a d’arquitèctes, a de poètas, a d’industrials, a de cineastas, a d’occitanofils, a de romancièrs... Belmon dediquèt sa vida a balhar la votz e a difusar la votz occitana dels autres.
 
 
 
T’oblidarem pas, Joan Pèire
Dissabte 29 d’octòbre de 14h a 20h a l’Ostau de Provença
8, Avenguda Jules Ferry, 13100 Ais de Provença
Mai d’informacions al CEP d’Òc, tel. +33(0)4 42 93 45 12, E.mail: cepdoc@free...




Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
1.

És trist que un germà del Nord se'n vagi, però segur que n'hi hauran molts d'altres.
Visca la Terra...Lliure!
L'Ernest, "El Tàrrega".

  • 0
  • 0

Escriu un comentari sus aqueste article