Bandièra01 1180x150: Comuna de Tolosa

Actualitats

crotz-tolosaCreated with Sketch.GuianaBordalésMedoc

De còps de fuòc dins una escòla de Parampuira (Medoc)

Una brega entre doas familhas engendrèt quitament de còps de fuòc dins la cort de l’escòla

| © RPEP

Una brega entre doas familhas se debanèt al près de l’escòla Joan Jaurés a Parampuira (Medoc). Los altercats arribèron quitament dins la cort de l’escòla ont se tirèt de còps de fuòc. Doas de las personas implicadas son feridas e los agressors son estats interpelats.


Segon d’informacions dels jornals L’Express e Sud Ouest, cap a 16h40, comencèt, ièr dimars, una altercacion entre doas familhas davant l’escòla Joan Jaurés de Parampuira. Un primièr protagonista foguèt ferit per arma blanca a la cara, e aquel repliquèt amb una arma de ponh, en ferissent lo sieu adversari a l’abdomèn. Aquel òme, que cerquèt de se refugiar dins l’escòla, foguèt perseguit per un tresen individú armat amb un fusilh que tirèt de còps de fuòc dins la cort sens s’avisar ont tirava.
 
Pasmens, l’òme perseguit es estat tocat, e l’an sonhat a l’espital Pellegrin de Bordèu, del temps que lo tresen òme, autor del còp de fuòc dins l’escòla, tanplan es estat interpelat.
 
Segon la polícia, “s’agís aparentament d’una altercacion anciana entre familhas, non ligada a l’encastre escolar”.
 
Del sieu costat, l’inspeccion d’acadèmia de Gironda a decidit d’installar una cellula psicologica pels enfants, pels parents e pels ensenhaires. A l’ora dels faches, los parents e los ensenhaires avián començat de metre los enfants a la sosta, mas qualques unes poguèron assistir a la scèna. Qualques enfants “foguèron testimònis”, segon l’inspector d’acadèmia qu’anèt sus plaça, acompanhat del mètge escolar per “avalorar las sequèlas als enfants e a la còla d’ensenhaires”.
 
S’es mobilizat qualques cinquanta gendarmas, un elicoptèr e una còla amb de cans per contunhar de rendre segur lo sector.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Guilhèm de l'Estuari Es tu, Harry ?
1.

Grand tuc Medòc, plan carnat, amb un reiregost de plomb que sotalinha armoniosament las linhas arrrièras de majoflas e d'amoras. Lo tuc Medòc de 2012 serà un crane vin de bèla qualitat modèrna ; modernassa…

  • 0
  • 1

Escriu un comentari sus aqueste article