Vint e dos ans après sa fin, l’apartheid, lo sistèma racista que promoviá los interèsses de la populacion blanca de Sud-Africa, subreviu encara e contunha de condicionar la realitat del país. Una exposicion inaugurada a Johannesburg, entitolada “Unequal Scenes” (de scènas d'inegalitat), denóncia que las comunitats blanca (encara privilegiada) e negra contunhan de se virar l’esquina.
 
Dins las fotografias, fachas amb de drònes a Durban, Johannesburg e Ciutat del Cap, se vei la fissura economica e urbanistica que separa aqueles dos monds: d'urbanizacions de luxe embarradas per de muralhas a qualques mètres dels quartièrs de barracas apelats townships.