Ongan la figura poetica de Bernat de Ventadorn, lo trobador lemosin saique lo mai liric de tot lo sègle XII, e los afeccionats de la poesia trobadoresca de l’Edat Mejana se poirán chalar amb la Trobada Internacionala Ventadorn. Aital, e a l’entorn de sa figura poetica e de la plaça que tenguèt dins la poesia occitana medievala, mas tanben dins la literatura universala, dins la vila de Darnet (Lemosin),  se debanarà un rescontre de cercaires, de poètas e d’artistas que faràn de collòquis publics sus aquel poeta lemosin, aqueste divendres 9 e tanben deman dissabte 10 de setembre. (Programa complet)
 
Los actes se tendràn per metre en comun totes las nòvas descobèrtas scientificas e literàrias que los cercaires, e tanben los afeccionats d’aquel trobador, an fachas pendent las darrièras annadas. La Trobada comença uèi amb de charradas publicas amb de títols tant interessants coma Bernat de Ventadorn, entre Alienòr d’Aquitània e Enric II d’Anglatèrra o Loscants de Ventadorn, entre la motivacion populara e la sapiéncia. A la fin del jorn Isabelle Bonnadier, Louis Soret, e Olivier Payrat faràn un concèrt amb de pèças del poèta medieval e d’autras originalas e pensadas per l’eveniment.
 
Deman dissabte, Darnet veirà una de las expèrtas actualas mai grandas dels trobadors occitans, Katy Bernard, de l’Universitat Bordèu-Montanha, dobrir los collòquis amb de tematicas tant interessantas coma Aquitània a l’epòca de Ventadorn, Lo Cantar d’Amor o la lectura de quatre pèças d’aquel trobador lemosin. A l’acte i assistiràn divèrses doctors en istòria medievala  o professors de las universitats de Peitieus, París o Palèrme. La serada tanben serà completada amb d’autres colloquis e la lectura publica de Del Lop e de la Cèrvia, una òbra poetica occitana musicalizada per Luc de Goustine, Jean Pierre Lacombe, e Olivier Payrat.
 
L’eveniment es estat organizat per l’Associacion Internacionala d’Estudis Occitans (AIEO) qu’an trabalhat amb las organizacions Trobadas e Carrefour Trobadours, en partenariat amb l’Universitat de Bordèu-Montanha e lo Ministèri de la Cultura francés. Tanben an cooperat per que siá possibla aquela trobada poetica plusors regions occitanas e la comuna de Darnet. Una escasença unica per conéisser prigondament un dels mai grands trobadors occitans, Bernat de Ventadorn.
 
 
 
 
Christian Andreu