Bandièra01 1180x150: Comuna de Tolosa

Actualitats

Un an de preson per un estudiant catalan detengut a la Nuèch de Pè de París

Lluc Valverde denóncia de torturas fisicas e psicologicas, e de contradiccions e messorgas evidentas dins lo jutjament. Commocion en Catalonha

Lluc Valverde après sa detencion
Lluc Valverde après sa detencion | Teresa Suárez
La justícia francesa a condemnat a un an de preson l’estudiant catalan Lluc Valverde, per participar a las protèstas contra la lei El-Khomri amb lo movement Nuèch de Pè (Nuit Debout en francés) a París. Valverde denóncia de torturas fisicas e psicologicas. La nòva a estrementit una bona partida de la societat catalana, çò rebaton los mèdias VilaWeb e Directa.
 
Puèi qu'es condemnat a un an de preson e a una multa d'11 100 èuros, los parents e los amics de Valverde an dobèrt una campanha sus Facebook per explicar la situacion sens filtres. Sul sit se pòt veire d’imatges de son estat abans e après la detencion, e s'i pòt far de dons per ajudar a pagar la multa.
 
Lluc Valverde es musician e estudiava lo teatre a l’Universitat de París 3. L’arrestèron lo 15 d’abril passat a París dins una de las nombrosas manifestacions de protèsta contra la reforma del còde del trabalh, la nomenada lei El-Khomri, amb lo movement Nuèch de Pè. Lo detenguèron al moment que fasiá de fòtos dels afrontaments entre policièrs e manifestants, çò rapòrta el meteis sus Directa. Puèi lo tenguèron 60 oras embarrat en preson e lo jutgèron lo 5 de julhet. Lo jutge lo condemnèt a pagar una multa d’11 100 èuros e a passar dotze meses en encarceracion. Valverde a demandat un recors en apelacion, mas an pas encara decidit una data pel nòu jutjament.
 
 
Marrits tractaments fisics e psicologics
 
Mentre que fasiá de fòtos, foguèt senhalat per un lasèr e sul pic foguèt entornejat de fòrça policièrs, çò rapòrta Valverde a Directa. “Espaurugat, aguèri solament lo temps de m’arrapar a un pal d’un panèl qu’aviái al costat. Tombèri al sòl e comencèron de me donar de còps de ponh e de còps de bota fins que daissèsse lo pal. Foguèt en aquel moment que me rompèron la man. Un dels policièrs en civil me prenguèt pel còl de ma vèsta e me trigossèt en tot m’escanar, sus los veires de las botelhas trencadas fins a l’autre costat del cordon policièr”, çò explica.
 
Foguèt menat al comissariat. Lo comissari justifiquèt la detencion e los marrits tractaments en l’acusant de lançar de projectils contra la polícia, d'agir violentament amb de còps de ponh e de còps de pè durant sa detencion e d'èsser lo complice d’un individu qu'aviá lançat una calada e ferit una gojata que se trobava a l'endrech dels afrontaments.
 
Los marrits tractaments finiguèron pas aquí. Segon Valverde ne patiguèt de fisics e de psicologics dins lo comissariat. En mai d’aquò, mentre qu’èra detengut, lo menèron a l’espital ont los mètges li prescriguèron de calmants que deviá prene cada sièis oras, a causa de las fracturas al nas e a la man. Pasmens, solament li donèron dos calmants durant las 60 oras de son arrestacion.
 
 
Contradiccions dins lo jutjament
 
Acusat de las causas que diguèt lo comissari per justificar los marrits tractaments, lo jorn del jutjament se manifestèt de diferéncias entre la version dels policièrs e la descripcion de l’operacion policièra en general. “La jutgessa aviá lo rapòrt medical qu’enumerava una molonada de feridas que jamai òm m’auriá pas pogut far amb dos o tres còps de ponh. Los policièrs mentissián sens cap de sòrta de vergonha davant ieu, quitament en tot negar de m’aver tabasat”, çò explica. En mai d’aquò, la gojata agarrida que la mençonava lo comissari, reconeguèt pas Lluc Valverde coma complice.

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

D\'r Schnockeloch Estrasborg
4.

A mai, nos prenen per de colhons!!!!

  • 4
  • 1
francesc palma de mallorca
3.

Las torturas, los cops covards a un detengut, los paísos de destra han practicat per los ensenhaments nazis e faisistes que han rebut. Aprés los tribunals polítics son per condemnar als acusats per colhons. En la frança atal, cada cop és mai en contra dels drets humans e mai de destra sota las botas de la troica, dels bancs e de las empreses privadas .

  • 4
  • 1
Ivan Barcelona
2.

#1 sénher Pessamessa, après legir los vòstres darrièrs comentaris remarqui que sètz un èsser vil, amar, crusèl, malvat e mespresable. Planhi la vòstra trista vida que vos a esnsenhat qu'asirar.

  • 20
  • 4
constantin valetudinari
1.

li a gaire agut d'arrestacions e de condamnacions d'aquelei destrussis (casseurs) qu'an acompânhat lei manistacions contra la lei dau trabalh e lei nuechs de drech, coma se dèu dire e non pas lo catalanisme nuech de pè que se ditz enluoc en pais occitan, lei milions de degasts seràn remborsats, un cop de mai per lo contribuable; en mai d'aquo, la CGT a publicat una aficha contra lei violénças policieras amb lo sang que raiava, ieu meti en dobte lo recit que ne fasetz e dins ma revista de premsa quotidiana dei jornaus catalans -gramaci internet_me soveni qu'un conselher municipau de la CUP à Barcelona aviá assajat de badas q'un top manta de color negra diguèsse qu'èra estat victima de brutalitats policieras, en estent que per l'ultra-esquerra ço que compta ei pas la veritat, mai l'accion politica per arribar au regima comunista ideau e la messorga es recomandada "la fin justifie les moyens" e renforça lo poder religios de l'ideologia e aquo nos a balhat lei dictaturas comunistas onte ço qu'an ben capitat ei la policia tota poderosa amb l'armada, lo golag e l'epuracion guepeou, KGB e companhiá e tot lo resta an fach chic, lo fracàs totau

  • 5
  • 28

Escriu un comentari sus aqueste article