Bandièra01 1180x150: País Invisible

Actualitats

Turquia: encarcèran una gojata occitanocurda que combatèt l'Estat Islamic

Las autoritats turcas l’acusan de preparar un atemptat amb lo PKK. L’arrestèron quand cambiava d’avion per tornar a Tolosa

| France Televisions
Ebru Firat es una gojata occitanocurda qu’a lo ciutadanatge francés e turc. Es encarcerada en Turquia dempuèi l’8 de setembre passat, acusada de preparar un atemptat kamikaze. Al moment de sa detencion, a l’aeropòrt Atatürk d’Istambol, Firat èra a mand de tornar a Tolosa après aver combatut l’Estat Islamic en Rojava.
 
L’arrestèron al moment de descendre de l’avion que veniá d’Amed (en turc Diyarbakır), per far sa correspondéncia. Segon France 3, la polícia aviá recebut una telefonada anonima que disiá qu’ela s’aprestava a cometre un atemptat suicida. Mas segon son avocata tolosana, “ela aviá vist sos parents en Curdistan e deviá prene l’avion per Tolosa ont aviá de mai una convocacion al Pòl Emplec”.
 
Ebru Firat aviá estudiat la medecina a Tolosa e a l’ora d’ara preparava un reportatge sus los milicians que combaton l’autoproclamat Estat Islamic. Arribèt a Rojava (lo Curdistan de l’estat sirian) en 2005 per ajudar a combatre l’Estat Islamic. Es alavetz que rescontrèt una còla de France 2 per un reportatge sus “los franceses que se baton contra Daesh”. En aquel reportatge la nomenavan Célina per de rasons de seguretat.
 
Ara la gojata occitanocurda e sa familha son plan inquietas. Ela es en preson dempuèi 11 jorns e las informacions arriban dificilament. “Aparentament ela a pogut veire un avocat sus placa, çò qu’es ja pro rar. Un autre conselh deu prene lo relat e ieu farai lo ponch sul dorsièr amb el dins los jorns que venon, mas ai ja pensat de me gandir sus plaça per la veire”, çò a dich a France 3 l’avocata tolosana.
 
Segon de fonts pròchas del govèrn turc, Ebru Firat es membre del Partit dels Trabalhadors de Curdistan (PKK), que las autoritats turcas considèran coma una organizacion terrorista.
 
La situacion es pas gaire encoratjanta per la jove encarcerada. E mai s’a dos passapòrts, lo turc e lo francés, lo contèxt de Turquia après l’endurciment del regim consecutiu al còp d’estat mancat es fòrça complicat. La premsa “oficiala” turca a difondut dempuèi sa detencion d’images d’Ebru Firat al costat de responsables del PKK en la nomenant “Amara”, coma se foguèsse nom de còde terrorista.
 
 
Mobilizacion en Occitània
 
La comunautat curda del país mandèt divendres passat un apèl al president francés François Hollande per que la diplomacia francesa intervenguèsse e faguèsse liberar Ebru Firat. A Albi, lo president de l’associacion francocurda de Miègjorn-Pirenèus a demandat la rapida intervencion del cap d'estat francés.
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc Palma
3.

Una gran femna digna filha d'Occitania, empresonada per lo regim mafiós terrorista turc.

  • 2
  • 0
Lo Faure Carcassona
2.

Auriá degut luchar per l'independéncia d'Occitània e se far petar a París. Seriá estat mai utile per nautres.

  • 6
  • 10
Joan Francés Blanc Liyon
1.

Curdistan, nòstra còrda roja, lo portulan nòstre... Solidaritat.

  • 9
  • 3

Escriu un comentari sus aqueste article