La primièra ministra britanica, Theresa May, afirmèt ièr dimenge que lo Reialme Unit activariá lo protocòl per quitar l'Union Europèa, en començant per l’invocacion de l’article 50 del Tractat de Lisbona, en març de 2017. Per tant, la sortida completa del Reialme Unit se debanarà dins la prima de 2019, abans las eleccions generalas.
 
La primièra ministra britanica a apondut que lo sieu govèrn serà en capacitat de menar a bon tèrme lo “trabalh preparatòri” abans l’invocacion de l’article en question, e que lo país traversarà una “transicion doça” après sa sortida de l'Union Europèa, segon çò que rapòrta la BBC. “Ara, los autres membres de l'Union Europèa deuràn decidir cossí se farà lo procès”.
 
“Lo calendièr es prèst pel primièr trimèstre de 2017”, çò diguèt. “E tre que s’activarà l’article, començarà un procès de negociacion mai fluid”, çò precisèt. Es lo primièr còp que May precisa una data per las negociacions avenidoiras.
 
Lo procès del Brexit prevei tanben que comprenga la revocacion de la lei de las comunautats europèas, que dona la prioritat a l’òrdre juridic europèu sul britanic. Aquò serà “lo primièr pas per que lo Reialme Unit venga un país sobeiran e independent encara un còp, e tornarà lo poder e l’autoritat a las institucions elegidas del nòstre país”, çò precisèt May dins una entrevista al suplement dominical de The Times.