Bandièra01 1180x150: Comuna de Tolosa

Actualitats

Colómbia: victòria sarrada del “non” a l’acòrdi de patz

Santos reconeis lo resultat del vòte, mas ditz que se mantendrà l’alta al fuòc

Lo “non” s’es impausat al referendum sus l’acòrdi de patz de Colómbia entre lo govèrn e las Fòrças Armadas Revolucionàrias de Colómbia (FARC), amb un resultat fòrça sarrat: lo 50,23% an votat “non” fàcia al 49,76% de ciutadans qu’an votat “òc”.
 
E mai s’aquel resultat es establit après que s’es espepissat lo 99,64% dels vòtes, es definitiu car los vòtes per la pòsta son pas sufisents per capvirar la situacion, e mai s’aquí l’“òc” i a ganhat de longa tòca.
 
Lo 26 de setembre passat signavan l’acòrdi de patz definitiu lo govèrn colombian e las FARC après un long procès de negociacions que comencèt l’an 2012 a L’ Avana (Cuba). Avián pas previst çò que se poiriá passar se lo pòble lor virava l’esquina. “Soi segur que ganharà l’òc”, çò diguèt lo president Juan Manuel Santos abans lo referendum.
 
Ara, Santos reconeis lo resultat del vòte, mas ditz que se mantendrà l’alta al fuòc. “Me rendrai pas, contunharai de cercar la patz fins al darrièr jorn de mon mandat, perque es lo camin per daissar un país melhor pels nòstres filhs”, çò a dich Santos. Tre ara dobrirà lo dialòg amb las fòrças politicas qu’an fach campanha per lo “non”, dont l’èx-president Álvaro Uribe.

 
 

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

cercamon
7.

#6 aquest matin, ai legit dins lo "periodico" un article qu'explicava lei rasons de la derrota electorau dau "si"que lei terrorristas farcs èran avantatjats, lei crims de guerra qu'avián comes tot just castigats,aqueu tractat leis autorizava a crear un partit e li donava de drech sai plus quant de setis de deputats au parlament, aquest article a dispareigut, remplaçat per d'autres comentaris e en mai d'aquo 62 % d'abstencions, serà mai negociat, que lei Farcs volon pas reprene leis armas e aquo vou dire que son estats vencuts sus lo terren e a pas agut agradat a mai de 50 % deis electors qu'ais uelhs de l'opinion publica ne sortiguèsson victorios ...

  • 0
  • 13
Pirolet
6.

#1
#2
#3 Amb de rasonaments aital seriam encara a nos carpinhar amb los alemands. Benlèu sètz de los que vòlon mandar Gerry Adams en preson e fotre en l'aire l'acòrdi de patz en Irlanda coma la piòta de UPyD (lo particulet espanholista aürosament gaireben escantit) al parlament europèu que sos companhs liberals li diguèron de daissar de caire las conariás. I a un moment que cal arrestar la violéncia, quitament se cal engolir lo talhon. Mai tard los istorians faràn lor trabalh; emai las justícia quand las causas sián apasimadas.

  • 12
  • 1
Andrés Barranquilla
5.

Avèm vist clar qual vòl vertadièrament la patz e la reconciliacion, e qual vòl que i aja de venceires e vençuts. Curiosament los primièrs son estats apelats "terroristas".

  • 7
  • 2
Companh Ros
4.

Solide, cal far mai de guèrra. La cultura militarista es comuna a tota la America ispana, ça que la, mantuns volon de revenge. Mas votar per ségre al Uribe es una vergonha, Uribe paramilitar e narcotraficant.

  • 18
  • 2
cercamon
3.

Per un punt Martin perdèt son ase, per una minuta de mens, Ivan me balha una responsa a la question que pausavi, una explicacion que dèu pas èstre aquela dau jornalet per cu Chavès es un eroï de la revolucion bolivariana e a ieu me pareis plausible qu'una bona mitat dau poble colombian trobèsson aquel acortd de patz trop favorable ai FARC que poguèsson leis entraïnar dins una aventura revolucionària pariera an aquela de sei vesins e que n'an vist de prop leis resultats : roïnas e carestiá
#1

  • 0
  • 18

Escriu un comentari sus aqueste article