Doas femnas iaziditas que l’Estat Islamic (EI) ne faguèt d’esclavas sexualas son estadas distinguidas pel Parlament Europèu amb lo Prèmi Sakharov, un dels principals guierdons mondials en matèria de dreches umans e libertat de pensada. Lo Parlament n’a soslinhat lo fach que las doas femnas sián vengudas una referéncia mondiala pels dreches de la comunautat iazidita davant lo genocidi patit de las mans de l’EI.

Las doas femnas, Nadia Murad e Lamiya Aji Bashar, son del vilatge de Kocho, dins lo parçan de Sinjar, al nòrd d’Iraq. Après assassinar totes los òmes del vilatge, los militants jihadistas menèron las femnas e los enfants e ne faguèron d’esclaus. Las femnas foguèron vendudas mai d’un còp e esplechadas sexualament. Las femnas vièlhas foguèron executadas.
 
Los iaziditas son un grop etnicoreligiós de lenga curda que viu, sustot, dins divèrsas encontradas de Curdistan e d’Armenia —e ara, tanben, en exili—. L’Estat Islamic los considèra coma un grop d’infidèls e d’adoradors del diable que meritan l’extermini.
 
 
Escapèron de la captivitat
 
Murad escapèt de la captivitat en novembre de 2014 e Aji Bashar o faguèt en abril d’ongan. En fugissent, a Aji Bashar li esclatèt una mina e demorèt ferida e gaireben cèga.
 
Murad foguèt nomenada per l’ÒNU ambaissadora de bona volontat per la dignitat dels subrevivents del trafec de personas durant aquel meteis mes de setembre.
 
Las doas femnas son vengudas, probablament, las pòrtavoses mai reconegudas del pòble iazidita, e se son consagradas a far prene consciéncia a la comunautat internacionala de l’agonia patida per aquel pòble a causa de las atrocitats de l’EI.
 
Murad a reclamat a l’ÒNU e als principals govèrns del Mond que socorran las femnas e los enfants iaziditas —qu’almens son 3200, segon çò que calcula l’ÒNU— que demòran sequestradas sus lo territòri de l’EI.
 
 
 
 

---

Aquesta nòva es adaptada de Nationalia amb qui Jornalet a un acòrdi de cooperacion,.