Bandièra01 1180x150: País Invisible

Actualitats

Un curat a indignat Itàlia en afirmar que los tèrratrems son un puniment de Dieu

Radio Maria a suspendut l’emission de Giovanni Cavalconi e demanda perdon. Lo prèire afirma que los sismes son “un puniment divin” per l’aprobacion de leis coma las que permeton lo maridatge dels omosexuals

La ràdio catolica italiana, Radio Maria, a anonciat la suspension de l’emission del prèire Giovanni Cavalcoli, perque i diguèt publicament que los tèrratrems qu’aviá patit lo centre d’Itàlia son “un puniment divin” per l’aprobacion de leis coma las que permeton lo maridatge dels omosexuals, çò rapòrta La Stampa.
 
Un auditor demandèt al teologian se “las catastròfas naturalas coma lo tèrratrem pòdon èsser la consequéncia d’un pòble e d’un legislator que fa de leis contràrias a Dieu”, en fasent referéncia a la que permet lo maridatge per totes. Après un moment de reflexion, Cavalcoli respondèt : “Òm a l’impression qu’aquelas ofensas a la lei divina fan pensar que sèm davant, digam, un puniment divin”.
 
Aqueles mots provoquèron l’indignacion en Itàlia, car lo país ven de patir dins los darrièrs meses divèrses tèrratrems qu’an devastat fòrça vilas e vilatges, dont un sisme de 6,5 grases a la fin d’octòbre en Ómbria e dins las Marchas.
 
Radio Maria, coneguda per sas posicions ultradrechistas, demandèt perdon als damnatjats pels tèrratrems que se foguèsson sentits otratjats a causa dels mots de Cavalcoli. En mai d’aquò, informèt que suspendriá “immediatament” lo programa mesadièr del prèire a causa de sas declaracions “que son pas en sintonia amb l’anóncia de la misericòrdia, qu’es l’esséncia del cristianisme e de l’accion pastorala del Papa Francés”.
 
Tanben Monsénher Angelo Becciu, lo numèro dos del Secretariat d’Estat del Vatican, demandèt perdon per aquelas declaracions que qualifiquèt d’“ofensantas pels cresents e pels noncresents”, çò rapòrta la Ràdio Vaticana.
 
Ça que la, Cavacoli tornèt afirmar sos prepauses dins lo programa La Zanzara de Radio 24, e recomandèt al Vatican de relegir lo catequisme.






Jornalet es possible gràcias al sosten economic e jornalistic dels legeires e benevòls. Se podètz sosténer en venent sòci dels Amics de Jornalet o de l’associacion ADÒC, contribuiretz a far un mèdia mai independent e de melhora qualitat.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article